नेपाली कम्युनिस्ट पार्टी हुम्लाले काठमाडौंमा पार्टी एकता सन्देश प्रवाह कार्यक्रम सम्पन्न

काठमाडौं, मंसिर ६ ,नेपाली कम्युनिस्ट पार्टी हुम्ला जिल्ला समितिले काठमाडौंमा रहेका हुम्लावासीबीच भेटघाट तथा पार्टी एकताको सन्देश प्रवाह कार्यक्रम सम्पन्न गरेको छ। शनिबार राजधानीको संवाद डबलीमा आयोजित कार्यक्रममा हुम्लाका विभिन्न नेताहरूले बदलिँदो राजनीतिक परिस्थितिमा एक दर्जनभन्दा बढी पार्टीहरू एकता प्रक्रियामा समेटिँदै समाजवादी क्रान्तिको यात्रा अघि बढेको दाबी गरे। एकता प्रक्रियामा संलग्न नेता कर्णजित बुढाथोकी ‘सुशील’ले विगतका कमी–कमजोरीहरूको सामीक्षा गर्दै नयाँ प्रतिबद्धतासहित सबै एकताबद्ध भई अघि बढ्नुपर्नेमा जोड दिएका थिए। त्यस्तै, नेता हस्तबहादुर शाहीले पुष्पलालले स्थापना गरेको कम्युनिस्ट आन्दोलनलाई नयाँ उचाइ दिने उद्देश्यले पार्टी एकता भएको भन्दै हुम्ला सर्केगाड उपनिर्वाचनमा बनेको समाजवादी मोर्चाले एकताको आधार तयार पारेको बताए। विघटित प्रतिनिधि सभा सदस्य छिरिङ डम्डुल लामाले विभाजनबाट थकित जनताले अब एकताको महाअभियानलाई साथ दिने समय आएको उल्लेख गर्दै इमान्दार प्रतिबद्धतासाथ लाग्न सबैलाई आग्रह गरे। संविधान सभा सदस्य छिमी लामाले पार्टीलाई गुट–उपगुटबाट जोगाउनुपर्ने र हुम्लामा गुटबन्दी नरहेको दाबी गर्दै एकताको सन्देश जनतासम्म पुर्‍याउन नेतृत्वले जिम्मेवारीपूर्वक काम गर्नुपर्ने धारणा राखे। युवा नेता डा. दीपेन्द्र रोकायाले काठमाडौंमा रहेका कार्यकर्ताहरूलाई गाउँ–बस्तीमा फर्केर एकताको नयाँ अध्यायलाई जनस्तरसम्म पुर्‍याउन अपिल गरे। महिला नेतृ सिता शाही र पेमा लामाले अवसरवाद छाडेर एकताको मूल भावना लिएर अघि बढ्नुपर्नेमा जोड दिए। एमालेबाट विद्रोह गरेका देविलाल रावलले केपी ओली प्रवृत्तिले कम्युनिस्ट आन्दोलनमा क्षति पुर्‍याएको र त्यसको पूर्ति नेपाली कम्युनिस्ट पार्टीले गर्ने विश्वास व्यक्त गरे। कार्यक्रममा युवा नेता मदन परियार र लोकगायक नवराज भण्डारीले देउडा गीत प्रस्तुत गर्दै वातावरणलाई उत्साहित बनाएका थिए। कार्यक्रम सफलतापूर्वक सम्पन्न भएको आयोजकले जनाएको छ। अब यो अभियान नेपालगञ्ज, सुर्खेत हुँदै हुम्लाका सबै पालिका, वडा, टोल र घर–घरसम्म विस्तार गरिनेछ।