जसपाको समाजवादी युवा संघ ७९ सदस्यीय केन्द्रीय तदर्थ समिति गठन

काठमाडौं, मंसिर ६ । जनता समाजवादी पार्टी (जसपा) नेपालले आफ्नो भातृ संगठन समाजवादी युवा संघ नेपालको ७९ सदस्यीय केन्द्रीय तदर्थ समिति गठन गरेको छ। जसपा नेपालको केन्द्रीय कार्यकारिणी समितिको निर्णयअनुसार युवा नेता मनिष यादवलाई केन्द्रीय समाजवादी युवा संघको अध्यक्षत जिम्मेवारी दिइएको छ। नवगठित समितिमा रेणुराज सिंह, चिरञ्जिवी यादव र रविन पाख्रिन उपाध्यक्ष चयन भएका छन्। त्यस्तै, दीपेन्द्र कापडी महासचिवमा नियुक्त भएका छन् भने सौरभ शर्मा, कमल नेम्वाङ, शिवराज बेघा, राजु यादव र विनय यादव पाँच सचिव रहेका छन्। शत्रुधन यादवलाई कोषाध्यक्षको भूमिकामा जिम्मेवारी दिइएको छ। समाजवादी युवा संघका इन्चार्ज विक्की यादवका अनुसार पदाधिकारी तथा सदस्यहरूको सपथ ग्रहण मंसिर १५ गते काठमाडौंमा विशेष कार्यक्रममा आयोजना हुनेछ। तदर्थ समितिलाई छ महिनाभित्र वडादेखि केन्द्रसम्म संगठन निर्माण गरी निर्वाचन सम्पन्न गर्ने कार्यभार जिम्मेवारीस्वरूप दिइएको उनले बताए। अध्यक्ष मनिष यादवका अनुसार संगठन निर्माण, विस्तार तथा संघीय निर्वाचन केन्द्रित आगामी कार्ययोजना छिट्टै सार्वजनिक गरिनेछ। उनका अनुसार युवा संघले देशभर वडा, पालिका, जिल्ला र प्रदेश तहसम्म संगठन विस्तार, युवा अभियान सुदृढीकरण तथा पार्टीको राजनीतिक कार्यक्रमलाई प्रभावकारी रूपमा अघि बढाउने लक्ष्य लिएको छ।