मधेश प्रदेशका सभामुख मण्डल दुई–तिहाइ बहुमतले पदमुक्त

ईमधेश न्यूज सम्वाददाता,
जनकपुरधाम, ०४ मंसिर ।
 . मधेश प्रदेश सभाका सभामुख रामचन्द्र मण्डल दुई–तिहाइ बहुमतले पदमुक्त भएका छन्। सभामुखले पदानुकूल आचरण नगरेको आरोपसहित प्रस्तुत प्रस्ताव सभामा बहुमतले पारित भएको हो।
प्रस्तावकहरूमध्ये सांसद कुमारकान्त झाले पेश गरेको प्रस्तावमा ७६ मत परेको प्रदेश सभाले जनाएको छ। यो संख्या सभाको तत्काल कायम पूर्ण सदस्य संख्या अनुसार आवश्यक दुई–तिहाइ (७२) बहुमतभन्दा बढी भएकाले प्रस्ताव पारित भएको मानिएको छ।
प्रदेश सभा कार्यसञ्चालन नियमावली २०७५ को नियम १८० बमोजिम दर्ता गरिएको उक्त प्रस्ताव नियम १८२ को उपनियम (४) अनुसार मतदानमा लगिएको थियो। नेपाल संविधानको धारा १८२(६)(ग) र नियमावलीका प्रावधानअनुसार प्रस्ताव पारित भएपछि सभामुख मण्डल स्वतः पदमुक्त भएका छन्।
मधेश प्रदेश सभाले जारी गरेको सूचनामा प्रस्ताव पारित भएसँगै सभामुख मण्डलको पदावधि तत्काल प्रभावबाट समाप्त भएको उल्लेख छ।
पदानुकूल आचरण नगरेको आरोपमा दर्ता भएको यो प्रस्ताव हालसम्म मधेश प्रदेश सभामा पारित भएको उच्च–स्तरीय संवैधानिक प्रक्रियामध्ये एक मानिएको छ। सभामुख पद रिक्त भएपछि नियमावलीअनुसार अब सभा बैठक उपसभामुखद्वारा सञ्चालन हुने व्यवस्था छ।
प्रदेश सभाले पदमुक्तिको निर्णय सम्बन्धित सबै पक्षलाई जानकारीको लागि सार्वजनिक गरेको छ।