विपक्षी सांसदहरूले प्रदेशसभा बैठक आह्वान गर्न उपसभामुखलाई पत्र बुझाए

ईमधेश न्यूज सम्वाददाता,
जनकपुरधाम, ०२ मंसिर ।
 मधेश प्रदेशमा विपक्षी सांसदहरूले प्रदेशसभा बैठक बोलाउन उपसभामुख बबिता राउत ईसरलाई मंगलबार पत्र बुझाएका छन्। उनीहरूले सभामुख रामचन्द्र मण्डलविरुद्ध दर्ता भएको पदअनुकूल आचरण नगरेको प्रस्तावको छलफल अघि बढाउन बैठक आह्वान गर्न माग गरेका हुन्।
विपक्षी दलको तर्फबाट माओवादी केन्द्रका संसदीय दलका नेता भरत साहले ३२ सांसदहरूको हस्ताक्षरसहित उपसभामुख समक्ष लिखित आग्रह गरे। साहका अनुसार, २५ प्रतिशत सदस्यको मागमा बैठक बोलाउने प्रावधान प्रदेशसभाको नियमअनुसार लागू हुन्छ।
पत्र बुझाउन पुगेका जनता समाजवादी पार्टीका सचेतक रामअशिष यादवले सभामुखविरुद्ध दर्ता प्रस्तावको छलफल प्रक्रिया अगाडि बढाउनुपर्ने बताए। बैठक आह्वानमा नेपाली कांग्रेस, जसपा नेपाल, जनमत पार्टी, लोसपा, नेकपा एकीकृत समाजवादी पार्टी र माओवादी केन्द्रका सांसदहरू सहभागी छन्।
उक्त बैठक मंसिर ३ गते बुधबार बोलाउने प्रस्ताव गरिएको छ। विपक्षी सांसदहरूले सभा आह्वानका माध्यमबाट सभामुखको कार्यप्रणालीमा पारदर्शिता र उत्तरदायित्व सुनिश्चित गर्ने उद्देश्य राखेको जनाइएको छ। यस कदमले प्रदेशसभामा राजनीतिक प्रक्रिया सक्रिय बनाउने र आवश्यक छलफल सुनिश्चित गर्ने अपेक्षा गरिएको छ।