एकतापछि नेकपाका नेताहरुको आरोप– ‘विदेशी प्रभावमा चलेको सरकार घातक’

ईमधेश न्यूज सम्वाददाता,
काठमाडौं, ०१ मंसिर ।
नेपाल कम्युनिस्ट पार्टी र नेपाल कम्युनिस्ट पार्टी (माक्र्सवादी)बीच औपचारिक एकता घोषणा भएको छ। राजधानीको संवाद डबलीमा मंगलबार आयोजित कार्यक्रममा दुवै पार्टीका नेताहरूले वर्तमान राजनीतिक व्यवस्था विदेशी हस्तक्षेपमा सञ्चालन भइरहेको भन्दै कडा आलोचना गरे।
लोक नारायण सुवेदी नेतृत्वको नेपाल कम्युनिस्ट पार्टी र अम्बिकाप्रसाद थैब नेतृत्वको नेपाल कम्युनिस्ट पार्टी (माक्र्सवादी) एक भई “नेपाल कम्युनिस्ट पार्टी” नाममा नयाँ संरचना बनेको घोषणा गरिएको हो। एकता कार्यक्रमपछि संयोजक सुवेदीले ‘नेकपा’ नाम दर्तामा प्रचण्डले “बलमिच्याइँ” गरेको भन्दै सर्वोच्च अदालत जाने चेतावनी दिए।
सुवेदीले जेन्जी आन्दोलनपछि बनेको सरकार जनमुखी नभई विदेशी स्वार्थअनुसार चलेको आरोप लगाए। “भारतीय टाउको र अमेरिकी हातखुट्टावाला सरकार देशका लागि घातक छ,” उनले भने। अहिले कम्युनिस्टहरूबीच ध्रुवीकरण जरुरी रहेको उनको धारणा थियो।
माक्र्सवादी अध्यक्ष अम्बिकाप्रसाद थैबले वर्गसंघर्ष र राजनीतिक अस्थिरता चिर्न यो एकता अपरिहार्य भएको बताए। नवगठित पार्टीले माक्र्सवाद–लेनिनवाद–माओवादलाई मार्गदर्शक विचारको रूपमा अपनाएको छ।
कार्यक्रममा विभिन्न वाम पार्टीका नेताहरूले राष्ट्रिय स्वाधीनता, जनअधिकार र राजनीतिक स्थायित्वका लागि कम्युनिस्ट शक्तिहरूबीच व्यापक एकता आवश्यक रहेको उल्लेख गरे।