सात दलीय गठबन्धनका सांसद सडकमा धर्ना बसे

ईमधेश न्यूज सम्वाददाता,
जनकपुरधाम, ३० कार्तिक ।
 मधेश प्रदेशमा मुख्यमन्त्री नियुक्ति विवाद चर्किसँगै सात दलीय गठबन्धनका सांसद आइतबार पनि सडकमा धर्ना बसेका छन् । नेपाली काँग्रेससहित सात दलका सांसदहरू प्रदेश सभा भवन अगाडि बाटो अवरुद्ध गर्दै धर्नामा बसेका हुन् ।
सभामुख रामचन्द्र मण्डलमाथि कारबाहीको माग गर्दै उनीहरूले शनिबार प्रदेश सभा परिसरकै चौरमा वैकल्पिक सभा सञ्चालन गरेका थिए । २४ कात्तिकमा तत्कालीन प्रदेश प्रमुख सुमित्रा सुवेदी भण्डारीले ठूलो दलको हैसियतमा एमाले संसदीय दलका नेता सरोजकुमार यादवलाई होटेलमै शपथ खुवाएर मुख्यमन्त्री नियुक्त गरेपछि सात दल निरन्तर विरोधमा उत्रिएका छन् ।
मुख्यमन्त्री नियुक्ति खारेज गर्न सर्वोच्च अदालतमा रिट दर्ता गरिसकेका उनीहरूले सभामुख मण्डलविरुद्ध महाअभियोग पनि दर्ता गराएका छन् । मधेश प्रदेशको राजनीतिक विवाद झनै पेचिलो बन्दै गएपछि जनकपुरमा सुरक्षा व्यवस्था कडा पारिएको छ ।