जनकपुरमा सात दलीय मोर्चाको आक्रोशपूर्ण प्रदर्शन

ईमधेश न्यूज सम्वाददाता,
जनकपुरधाम, २९ कार्तिक ।
 मधेश प्रदेशको सत्ता–राजनीतिमा बढ्दो विवादसँगै जनकपुरमा सातदलीय मोर्चाले आज फेरि प्रदर्शन गरेको छ। सरकार गठनमा भएको राजनीतिक हस्तक्षेप तथा सभामुख रामचन्द्र मण्डलविरुद्ध दर्ता गरिएको प्रस्ताव रोकिएको भन्दै मोर्चाले सडकमा उत्रिएर विरोध जनाएका हुन्।
शनिबार बिहानदेखि मोर्चाका कार्यकर्ताले प्रदेशसभा भवनअगाडि नाराबाजी गर्दै प्रदर्शन गरिरहेका छन्। सभामुखविरुद्धको प्रस्ताव बुझाउन सांसदहरू प्रदेशसभा सचिवालय पुगेका बेला हातपातसमेत भएको थियो। त्यसपछि सभामुख मण्डलले सात दलका पाँच जना सांसदलाई पदमुक्त गरेका थिए। यही निर्णयको विरोधमा मोर्चा संघर्षमा उत्रिएको हो।
उता, सम्भावित झडपलाई मध्यनजर गर्दै प्रहरीले प्रदेशसभा क्षेत्र र जनकपुरको मुख्य चोक–चोकमा बाक्लो सुरक्षा व्यवस्था गरेको छ। स्थिति नियन्त्रित राख्न नेपाल प्रहरी र सशस्त्र प्रहरी दुवै परिचालन गरिएको जनाइएको छ।
सातदलीय मोर्चाले सभामुखको तत्काल राजीनामा र प्रदेशसभाको नियमित कार्य सञ्चालन सुनिश्चित गर्न माग राख्दै आन्दोलन निरन्तर रहने चेतावनी दिएको छ।