शुसिला कार्कीको औचित्य समाप्त, राजीनामा दिनुपर्छ: पहिला देश

ईमधेश न्यूज सम्वाददाता,
काठमाडौं, २९ कार्तिक ।
  पहिला देश (पिलुल्स रिभोल्यूसन)ले शुसिला कार्की नेतृत्वको सरकार जनआकांक्षा र जेन्जी विद्रोहको भावना अनुसार चल्न नसकेको आरोप लगाउँदै उनको तत्काल राजीनामा माग गरेको छ। बुधबार राजधानीमा आयोजित पत्रकार सम्मेलनमा संगठनले मंसिर ५ देखि पुष १० गतेसम्म पूर्व–पश्चिम महासंकल्प यात्रा सुरु गर्ने घोषणा पनि गरेको छ।
संयोजक एसपी शाहले वर्तमान सरकारले जेन्जीको बलिदानको मूल्य नबुझी पुरानै राजनीतिक शैली दोहोर्याएको आरोप लगाए। उनले सरकारको विफलताले देश अप्ठ्यारो मोडमा पुगेको भन्दै प्रधानमन्त्री कार्कीको विस्थापन आवश्यक भएको बताए।
प्रवक्ता डा. निकोलस भुसालले जेन्जी आन्दोलनमा गोली चलाउन आदेश दिने तत्कालीन प्रधानमन्त्री तथा गृहमन्त्रीलाई कारबाही नगरी उल्टै आन्दोलनकारीलाई पक्राउ गर्नुलाई “गैरन्यायिक” भने। उनका अनुसार भ्रष्टाचार र कुशासनलाई रोक्ने अपेक्षा पूरा नभएकाले सरकारको औचित्य समाप्त भइसकेको छ।
सचिवालय सदस्य धरणीधर दाहालले “शुसिला कार्की सिंहदरबारमा फोटो झुन्ड्याउन मात्रै आएकी हुन्” भन्दै प्रत्यक्ष कार्यकारी प्रमुख चयन नभएसम्म फागुन २१ को चुनाव हुन नदिने चेतावनी दिए।
महासंकल्प यात्रा ताप्लेजुङबाट सुरु भएर लिम्पियाधुरा पुग्ने र मार्गमा प्रदेश–प्रदेशमा जनसम्पर्क कार्यक्रम चलाइने संगठनले जनाएको छ। यात्रा सकिएको पाँच दिनपछि, पुष १५ गते काठमाडौंमा वृहत राष्ट्रिय भेला हुने पिलुल्स रिभोल्यूसनले जनाएको छ।