मधेश सभामुखविरुद्ध पद–अनुकूल आचरण नगरेको आरोप, प्रदेशसभा सचिवालयमा तनाब

ईमधेश न्यूज सम्वाददाता,
जनकपुर, २७ कार्तिक ।
 मधेश प्रदेशका सभामुख रामचन्द्र मण्डलविरुद्ध सात दलबारे पद अनुकूल आचरण नगरेको प्रस्ताव दर्ता गर्ने क्रममा बिहीबार प्रदेशसभा सचिवालयमा ठूलो तनाब सिर्जना भएको छ। सात दलका संसदीय दलका नेता र सांसदहरू संयुक्त रूपमा सचिवालय पुगेर प्रस्ताव बुझाउने प्रयत्न गर्दै थिए।
प्रस्ताव दर्ताका लागि सांसदहरू उपसभामुख बबिता राउतको कार्यकक्षमा बसेका थिए। तर, सचिवालयका कर्मचारीहरूले कार्यालय समय सकिएको, कर्मचारी नहुँदा र विद्युत् नआएको भन्दै दर्ता प्रक्रिया अघि नबढाउँदा विवाद चर्किएको थियो। जसपाका प्रमुख सचेतक आशिष यादवका अनुसार सभामुख मण्डलले सांसदहरूमाथि अभद्र व्यवहार तथा हातपातसमेत गरेका छन्।
करिब ६ बजे सभामुख मण्डल आफ्ना समर्थकसहित सचिवालय पुगेपछि स्थिति झन् तनावग्रस्त बनेको जनाइएको छ। जनमतका सांसद चन्दन सिंह, लोसपाका सांसद उपेन्द्र महतोलगायतलाई मण्डलले हातपात गरेको आरोप लगाइएको छ। माओवादी संसदीय दलका नेता भरत साहले सभामुखको व्यवहार अत्यन्त आक्रामक रहेको बताए।
करिब डेढ घण्टा घेराबन्दीमा परेका सांसदहरूलाई नेपाल प्रहरी र सशस्त्र प्रहरीको टोलीले उद्धार गरेको जसपाका सांसद राजु गुप्ताले बताए। यता, सभामुख मण्डलले आफूले कसैलाई बन्धक नराखेको दाबी गर्दै घटनालाई ‘राजनीतिक रंग’ दिएको आरोप प्रतिवाद गरेका छन्।
उता, सभामुख मण्डलले नियमित १० बैठकमा उपस्थित नभएका पाँच सांसदलाई पदमुक्त भएको सूचना पनि जारी गरेका छन्। पदमुक्त सूचीमा नागरिक उन्मुक्ति तथा जसपाका सांसदहरू परेका छन्।
प्रस्ताव दर्ता विषय र सभामुखविरुद्धको आरोपसँगै मधेश प्रदेशको राजनीतिक वातावरण थप तातिएको देखिन्छ।