मधेशका सभामुखविरुद्ध सात दलको अविश्वास प्रस्ताव, एमालेको अवरोधमा दर्ता रोकियो

जनकपुर, कात्तिक मधेश प्रदेशसभाका सभामुख रामचन्द्र मण्डल विरुद्ध सात दलले अविश्वासको प्रस्ताव दर्ता गर्न खोज्दा नेकपा एमालेले अवरोध गरेको छ। सभामुख मण्डलले प्रदेशसभाको तटस्थता नदेखाएको र सभाको गरिमा हानि पुर्‍याएको आरोप लगाउँदै नेपाली कांग्रेस, जनमत, जसपा नेपाल, लोसपा नेपाल, नेकपा (एकीकृत समाजवादी) र नेकपा (माओवादी केन्द्र) सहितका सात दलले प्रस्ताव ल्याएका हुन्। ७४ जना सांसदले हस्ताक्षर गरेको प्रस्ताव दर्ताका लागि टोली सभामुख सचिवालय पुग्दा एमाले कार्यकर्ताले रोकावट गरेपछि सचिवालयमा तनावपूर्ण स्थिति सिर्जना भएको छ। दलहरूले सभामुखले मुख्यमन्त्री जितेन्द्रप्रसाद सोनार (सोनल) को विश्वासको मत लिने प्रक्रिया बिगारेको र त्यसपछि सभा स्थगित गरेर एमालेलाई सरकार बनाउन सहज वातावरण बनाएको आरोप लगाएका छन्। मुख्यमन्त्री सोनलले विश्वासको मत लिने वातावरण नभएको भन्दै राजीनामा दिएपछि तत्कालीन प्रदेश प्रमुख सुमित्रा भण्डारीले एमालेका सरोजकुमार यादवलाई मुख्यमन्त्री नियुक्त गरेकी थिइन्। पछि भण्डारीलाई संघीय सरकारले पदमुक्त गरी नयाँ प्रदेश प्रमुख सुरेन्द्र लाभ कर्ण नियुक्त गरिएको छ।