प्रधानमन्त्री कार्कीको राजीनामा माग्दै सात जेन्जी समूह एकताबद्ध

ईमधेश न्यूज सम्वाददाता,
काठमाडौँ, २४ कार्तिक ।
 सातवटा जेन्जी समूहले एकता घोषणा गर्दै प्रधानमन्त्री शुसिला कार्कीको राजीनामा माग गरेका छन् । सोमबार राजधानीको संवाद डबलीमा पत्रकार सम्मेलन गर्दै उनीहरूले सरकारलाई अन्तिम चेतावनीसमेत दिएका हुन् ।
‘जेन्जी एकता अभियान नेपाल’की संयोजक सुप्रिया नेपालीले सरकारले भदौ २३ र २४ गतेको आन्दोलनमा सहभागी भएको आरोपमा जेन्जीहरूलाई छानीछानी पक्राउ गरेको भन्दै आक्रोश व्यक्त गरिन् । उनले प्रधानमन्त्री कार्कीले जनताको भावना र आन्दोलनको मर्मअनुसार काम नगरेकाले राजीनामा दिनुपर्ने माग गरिन् ।
पूर्व प्रहरी महानिरीक्षक सर्वेन्द्र खनालले जेन्जीको बलबाट बनेको सरकारले आफ्नै समर्थकहरूलाई आतंकित पार्न थालेको आरोप लगाए । उनले भने, “अहिलेको सरकार र ओली सरकारले बीच कुनै फरक छैन, गोली हान्न आदेश दिने र त्यसका जिम्मेवारहरूलाई कारबाही गर्नुपर्छ ।”
प्रवक्ता विरजन विश्वकर्माले सात वटा समूह — जेन्जी परिषद, जेन्जी २.०, जेन्जी पिपुल, रियल जेन्जी मुभमेन्ट नेपाल, जेन्जी नेपाल, एनटेक–जेड र अछाम जेन्जी समूह — एक भएर ‘जेन्जी एकता अभियान नेपाल’ गठन भएको जानकारी दिए ।
सल्लाहकार मेगराज खत्रीले देशको विषम परिस्थितिमा सबै जेन्जीहरू एकत्र हुनु सकारात्मक पहल भएको बताए । अन्य सहभागीहरूले पनि भ्रष्टाचार, कुशासन र सरकारको असफलताविरुद्ध एकताबद्ध संघर्ष गर्ने प्रतिबद्धता व्यक्त गरे ।