फाल्गुनन्द जयन्ती, २०८२ को उपलक्ष्यमा उपराष्ट्रपति यादवको शुभकामना सन्देश

लिलाकान्त यादव,
काठमाडौँ, २४ कार्तिक ।
 किराँत धर्म र संस्कृतिको संरक्षण तथा समाज सुधारमा जीवन समर्पित महागुरु फाल्गुनन्दको जन्मजयन्ती, २०८२ को पावन अवसरमा उपराष्ट्रपति रामसहाय प्रसाद यादवले देश–विदेशमा रहनुभएका सम्पूर्ण किराँत धर्मावलम्बी साथै नेपाली दिदीबहिनी र दाजुभाइहरूमा सुख, शान्ति, समृद्धि र सु–स्वास्थ्यको कामना गर्नुभएको छ ।
उपराष्ट्रपति यादवले शुभकामना सन्देश जारी गर्दै महागुरु फाल्गुनन्दले प्रस्तुत गर्नुभएको ‘सत्यधर्म मुचुल्का’ आज पनि उत्तिकै सान्दर्भिक रहेको उल्लेख गर्नुभयो । उहाँका अनुसार विवाहमा दाइजो लिन नहुने, जीव हत्या नगरी भगवानको पूजा गर्ने, मद्यपान तथा मासु सेवन नगर्ने र मृत्यु संस्कारलाई मितव्ययी बनाउने जस्ता उपदेशहरूले समाजलाई कुसंस्कृति र आडम्बरबाट मुक्त गर्ने प्रयास गरेका थिए ।
यादवले फाल्गुनन्दको आदर्श केवल किराँत समुदायका लागि होइन, सम्पूर्ण नेपाली समाजका लागि अनुकरणीय मार्गदर्शन भएको बताउनुभयो । उहाँले थप भन्नुभयो, “महागुरुका उपदेशहरूले हामीलाई मितव्ययी, संयमित र संस्कृतिप्रेमी जीवनशैलीतर्फ प्रेरित गर्छन्, जसले विविध संस्कृतिहरूबीच सहअस्तित्व र सद्भाव बलियो बनाउँछ ।”
उपराष्ट्रपतिले फाल्गुनन्द जयन्तीले संघीय लोकतान्त्रिक गणतन्त्रात्मक नेपालमा रहेका बहुजातीय, बहुभाषिक र बहुसांस्कृतिक पहिचानहरूलाई एक सूत्रमा बाँध्ने अवसर प्रदान गर्ने विश्वास व्यक्त गर्नुभयो ।
“महागुरु फाल्गुनन्दको सत्मार्ग र नैतिक निष्ठाबाट प्रेरित भई हामी सबैले राष्ट्रिय एकता, अखण्डता र सार्वभौमिकतालाई सुदृढ बनाउँदै मुलुकको विकास यात्रामा जुट्नुपर्छ,” यादवको शुभकामना सन्देशमा उल्लेख छ ।