प्रदेश प्रमुखले मधेशको अस्मितामाथि प्रहार गरिन्: जितेन्द्र सोनलको आरोप

ईमधेश न्यूज सम्वाददाता,
जनकपुरधाम, २४ कार्तिक ।
 मधेश प्रदेशका निवर्तमान मुख्यमन्त्री तथा लोकतान्त्रिक समाजवादी पार्टी (लोसपा)का नेता जितेन्द्र सोनलले प्रदेश प्रमुख सुमित्रा सुवेदी भण्डारीमाथि मधेश प्रदेशको अस्मिता समाप्त पार्ने आरोप लगाएका छन् ।
स्वास्थ्य उपचारका लागि काठमाडौं जाँदै गरेको बताउँदै भण्डारीले बाटोमा नै एमालेका सरोज यादवलाई मुख्यमन्त्री नियुक्त गरेको विषयलाई सोनलले “मधेशको अस्मितामाथिको प्रहार” भनेका छन् । उनले सामाजिक सञ्जालमा लेखेका छन्, “मधेश प्रदेशका जनतासँग ठूलो धोका भयो । उपचारका नाममा निस्केकी प्रदेश प्रमुख भण्डारीले सिन्धुली–महोत्तरी सीमाको एउटा होटेलमा प्रदेशको अस्मिता बेचिन् ।”
सोनलका अनुसार सोमबार बिहान आफूले नै भण्डारीलाई उपचारका लागि बिदाइ गरेका थिए । तर केही समयपछि उनले एमालेको ठूलो दलको हैसियतमा सरोज यादवलाई मुख्यमन्त्री नियुक्त गरेको सूचना प्राप्त भएको बताए ।
गत शनिबार सभामुखको रवैयाको कारण सोनलले मुख्यमन्त्री पदबाट राजीनामा दिएका थिए । उनले अहिलेको राजनीतिक घटनाक्रमलाई “लोकतान्त्रिक मूल्य र प्रदेश स्वायत्ततामाथिको अपमान” भन्दै आलोचना गरेका छन् ।