मधेश प्रदेश सभा अवरुद्ध: सभामुखको निर्णयमा असन्तुष्ट सत्ता पक्ष बाहिरिएपछि बैठक स्थगित

ईमधेश न्यूज सम्वाददाता,
जनकपुरधाम, २२ कार्तिक ।
 मधेश प्रदेश सभा मंगलबार १० मिनेटका लागि स्थगित भएको छ । कार्यसूचीलाई उछिनेर सभामुखले नेकपा (माओवादी केन्द्र) का सांसद रहबर अन्सारीलाई बोल्न अनुमति दिएपछि सरकार पक्षका सांसदहरूले आपत्ति जनाउँदै सदनबाट बाहिरिएका हुन् ।
सत्ता पक्षका दलहरूले सभामुख रामचन्द्र मण्डललाई ३० मिनेटपछि मात्र बैठक सञ्चालन गर्न माग गरेका थिए । तर सभामुखले मधेश प्रदेश सभा कार्य सञ्चालन नियमावलीअनुसार बैठक अघि बढाउने अडान लिएपछि विवाद चर्किएको हो । माओवादी केन्द्रका संसदीय दलका नेता भरतप्रसाद साहले सभामुखको निर्णयप्रति विशेष आपत्ति जनाएका छन् ।
यसबीच, माओवादी सांसद रहबर अन्सारीले विद्रोह गरेपछि मुख्यमन्त्री जितेन्द्र सोनलको सरकार विश्वासको मत पाउने वा नपाउने भन्ने अनिश्चितता बढेको छ । सत्ता गठबन्धनका ५४ जना सांसद उपस्थित भए पनि माओवादी केन्द्रका दुई सांसद  रहबर अन्सारी र माला कर्णले सदनमै विद्रोह गरेका छन् ।
१०७ सदस्यीय प्रदेश सभामा बहुमतका लागि ५४ मत आवश्यक छ । जनमत पार्टीका दुई सांसद — सतिशकुमार सिंह र त्रिभुवन शाह  अनुपस्थित छन् भने संघीय समाजवादी पार्टीकी सांसद विमला अन्सारी पनि सदनमा उपस्थित थिइनन् ।
सत्ता गठबन्धनमा लोसपाका ८, जसपा नेपालको १८, जनमतका १३, माओवादीका ९ र एकीकृत समाजवादीका ७ सांसद छन् । नागरिक उन्मुक्ति पार्टीले मुख्यमन्त्री सोनललाई विश्वासको मत दिने घोषणा गरे पनि मत विभाजन प्रक्रिया विवादका कारण रोकिएको छ ।