मुख्यमन्त्री सोनलको अपिल : राष्ट्रिय भिटामिन ‘ए’ कार्यक्रम सफल बनाउन सबै निकायलाई आग्रह

जनकपुरधाम, कार्तिक २० l मधेश प्रदेशका मुख्यमन्त्री जितेन्द्र प्रसाद सोनार ‘सोनल’ ले आगामी कार्तिक २० र २१ गते देशभर सञ्चालन हुने राष्ट्रिय भिटामिन ‘ए’ कार्यक्रम सफल बनाउन सबै स्थानीय तह, स्वास्थ्यकर्मी र सरोकारवालाहरूलाई सक्रिय सहयोगका लागि अपिल गर्नुभएको छ। मुख्यमन्त्री तथा मन्त्रिपरिषद्को कार्यालय, जनकपुरधामबाट जारी गरिएको विज्ञप्तिअनुसार, कार्यक्रम अन्तर्गत ६ महिना देखि ५ वर्ष मुनिका बालबालिकालाई भिटामिन ‘ए’ क्याप्सुल र १ वर्ष देखि ५ वर्ष मुनिका बालबालिकालाई जुकाको औषधि (अलवेन्डाजोल ट्याबलेट) खुवाइनेछ। प्रदेश सरकारका अनुसार, कार्यक्रम महिला स्वास्थ्य स्वयंसेविका र स्वास्थ्यकर्मीहरूको सहयोगमा सबै वडास्तरमा सञ्चालन गरिनेछ। यस अभियानले बालबालिकामा भिटामिन ‘ए’ को कमीबाट हुने अन्धोपन, कुपोषण, र जुकाको संक्रमण घटाउने लक्ष्य राखेको छ। मुख्यमन्त्री सोनारले विज्ञप्तिमा भन्नुभएको छ — > “बालबालिकाको स्वास्थ्य हाम्रो भविष्य हो। प्रत्येक अभिभावक र स्थानीय तहले यस अभियानमा सक्रिय सहभागिता जनाई आफ्ना बालबालिकालाई भिटामिन ‘ए’ र जुकाको औषधि खुवाउनु आवश्यक छ।” यससँगै मधेश प्रदेश सरकारले सबै स्वास्थ्य संस्था, स्थानीय तह र सरोकारवालाहरूलाई कार्यक्रम पूर्ण सफलताका साथ सम्पन्न गर्न सहकार्य गर्न आह्वान गरेको छ।