कार्यवाहक राष्ट्रपति यादव र कोरियाली राजदूतबीच शिष्टाचार भेट

 काठमाडौं, कात्तिक २० l कार्यवाहक राष्ट्रपति रामसहाय प्रसाद यादवसँग नेपालका लागि गणतन्त्र दक्षिण कोरियाका राजदूत पार्क ताए योङ्गले बिहीबार लैनचौरस्थित उपराष्ट्रपतिको कार्यालयमा शिष्टाचार भेट गरेका छन्। भेटमा दुई देशबीचको द्विपक्षीय सम्बन्ध सुदृढ गर्ने उपायहरू, विशेषगरी पर्यटन, श्रम तथा रोजगार, ऊर्जा, पूर्वाधार विकास, लगानी र जनस्तरका सम्बन्ध लगायतका विषयमा विस्तृत छलफल भएको थियो। कार्यवाहक राष्ट्रपति यादवले हालै सम्पन्न ‘जेनजी आन्दोलन’ पछि नयाँ सरकार गठन भइसकेको उल्लेख गर्दै नेपालको लोकतान्त्रिक यात्राप्रति प्रतिबद्धता पुनः दोहोर्याए। उहाँले आगामी २०८२ फागुन २१ (५ मार्च २०२६) मा प्रतिनिधिसभा निर्वाचन सम्पन्न गर्नु सरकारको प्रमुख कार्यभार रहेको बताउनुभयो। राष्ट्रपति यादवले नेपाल–कोरिया सम्बन्धको ५०औं वार्षिकोत्सव सफलतापूर्वक सम्पन्न भएको स्मरण गर्दै दुई देशबीचको सम्बन्ध मैत्रीपूर्ण, आपसी सम्मान र समझदारीमा आधारित रहेको बताउनुभयो। उहाँले इपीएस कार्यक्रममार्फत नेपाली युवालाई रोजगारीको अवसर उपलब्ध गराएकोमा कोरियाली सरकारप्रति धन्यवाद व्यक्त गर्दै आगामी दिनमा सहकार्यलाई अझ गहिरो बनाउने प्रतिबद्धता जनाउनुभयो। कोरियाली राजदूत पार्क ताए योङ्गले नेपालप्रति कोरियाली सरकारको सद्भाव, सहयोग र मित्रता निरन्तर रहने प्रतिबद्धता व्यक्त गरे। उनले ‘जेनजी आन्दोलन’को मागअनुसार बनेको नयाँ नेपाल सरकारलाई समर्थन जनाउँदै आगामी निर्वाचनका लागि सहयोग र शुभकामना व्यक्त गरे। राजदूत योङ्गका अनुसार, कोरियाले विगत तीन दशकदेखि शिक्षा, कृषि र सूचना प्रविधि क्षेत्रमा नेपाललाई सहयोग गर्दै आएको छ। उनले रोजगारका अवसर थप विस्तार गर्ने तयारी भइरहेको र धेरै कोरियाली कम्पनीहरू नेपालमा लगानी गर्न इच्छुक रहेको जानकारी दिए।