गुरुनानक जयन्तीको अवसरमा कार्यवाहक राष्ट्रपति यादवद्वारा शुभकामना 

लिलाकान्त यादव,
काठमाडौँ, १८ कात्तिक ।
 कार्यवाहक राष्ट्रपति रामसहाय प्रसाद यादवले गुरुनानक जयन्ती (प्रकाश पर्व) २०८२ को अवसरमा स्वदेश तथा विदेशमा रहनुभएका सम्पूर्ण शिख समुदायसहित सबै नेपाली दिदीबहिनी तथा दाजुभाइहरूलाई सुख, शान्ति, समृद्धि र सु–स्वास्थ्यका लागि शुभकामना व्यक्त गरेका छन्।
बुधबार जारी शुभकामना सन्देशमा उनले सत्य, समानता र भ्रातृत्वको सन्देश बोकेको गुरुनानक जयन्तीले सबैमा एकता, सहिष्णुता र सामाजिक सद्भाव फैलाउने उल्लेख गरेका छन्। “गुरुनानक देवले सम्पूर्ण मानव जातिलाई ‘एक ओमकारा’, ‘एक सतनाम’ अर्थात् ईश्वर एउटै हुनुहुन्छ भन्ने सार्वभौम सत्यको सन्देश दिनुभयो,” यादवले भनेका छन्।
उनले गुरुनानक देवले दिनुभएको शिख धर्मका त्रिसूत्रीय सिद्धान्त—‘इमानदारीपूर्वक परिश्रमले कमाऊ’, ‘लोभ–मोह त्यागेर सत्यको स्मरण गर’ र ‘कमाएको धन अरुसँग बाँडेर उपभोग गर’—आज पनि उत्तिकै सान्दर्भिक रहेको बताए। यी जीवन सूत्रहरूले सच्चा, नैतिक र अनुशासित जीवन जिउने बाटो देखाउने उनको भनाइ छ।
राष्ट्रपतिले गुरुद्वाराहरूमा गरिने कीर्तन, दीप प्रज्वलन र लंगरको परम्पराले साम्प्रदायिक एकता र समानता प्रवद्र्धन गर्न मद्दत पुगोस् भन्ने कामना व्यक्त गरे।
सन्देशमा उनले गुरु ग्रन्थ साहिबको पाठबाट प्राप्त हुने ज्ञानले समाजमा विद्यमान विकृति, विसंगति र विभेद अन्त्य गर्ने प्रेरणा मिलोस् भन्दै गुरुनानक देवको सत्य र परोपकारको बाटो आत्मसात गर्न सबैलाई आह्वान गरेका छन्।
“गुरुनानक जयन्तीले सबै नेपालीलाई शान्त, सौम्य र सभ्य समाज निर्माणमा जुट्न र राष्ट्रिय एकतालाई बलियो बनाउँदै समृद्ध नेपालको निर्माणतर्फ अग्रसर बनाओस्,” राष्ट्रपति यादवले शुभकामना सन्देशमा भनेका छन्।