शुसिला कार्कीबाट केही हुँदैन, राजीनामा दिनुपर्छ: पहिला देश अभियान

ईमधेश न्यूज सम्वाददाता,
काठमाडौं, १३ कार्तिक ।
 पहिला देश (पिपुल्स रेभुलेसन) अभियान ले प्रधानमन्त्री शुसिला कार्कीले राष्ट्रको हितमा काम गर्न असफल भएको आरोप लगाउँदै राजीनामाको माग गरेको छ। बिहीबार राजधानीको संवाद डबलीमा आयोजित पत्रकार सम्मेलनमार्फत अभियानले कात्तिक १६ गतेदेखि सरकारविरुद्ध आन्दोलन सुरु गर्ने घोषणा गरेको हो।
संयोजक एसपी शाह ले जेन्जी आन्दोलनबाट जनतामा देखिएको आशा वर्तमान सरकारले मथर गरेको भन्दै, जेन्जी, लघुवित्त, सहकारी, मिटर ब्याज र बैंकका पीडितहरूका माग पूरा नभएसम्म निरन्तर संघर्ष जारी रहने चेतावनी दिए। उनले संविधान परिमार्जन सभाको गठन माग गर्दै भने, “शुसिला कार्कीको सरकार न घोडा न गधा, खच्चडजस्तै भयो, देशले यसबाट निकास पाउँदैन।”
संरक्षक मनिराम ज्ञवाली ले पनि हालको सरकार पूर्वप्रधानमन्त्री केपी ओलीको भन्दा फरक नभएको भन्दै, वित्तीय शोषण अन्त्य र राष्ट्र बैंकको भूमिका पुनरावलोकन गर्न माग गरे। अन्य वक्ताहरू—सूरेश घिमिरे, विकास स्नेही, सम्भू थापा र सौरभ भण्डारीले सरकारले वित्तीय पीडित र मिटर ब्याजी समस्याप्रति वेवास्ता गरेको भन्दै तत्काल संविधान परिमार्जन सभा गठन गर्न माग गरे।