सप्तरीका विभिन्न स्थानमा छठ पर्व आज अस्ताउँदो सूर्यलाई अर्घ्य

लिलाकान्त यादव,
राजविराज, १० कार्तिक ।
 धार्मिक आस्था र सांस्कृतिक उल्लासका साथ आज सप्तरी जिल्लाका विभिन्न स्थानमा छठ पर्वको अवसरमा अस्ताउँदो सूर्यलाई अर्घ्य अर्पण गरिँदैछ ।
तराई–मधेशको प्रमुख पर्व मानिने छठ पर्वको तेस्रो दिन आज साँझ व्रती महिलाहरूले नदी, तलाउ र पोखरीका घाटहरूमा पुगेर अस्ताउँदो सूर्यलाई दूध, जल र प्रसादसहित अर्घ्य अर्पण गरिरहेका छन् ।
सप्तरीको राजविराजस्थित भगवती पोखरी, हनुमाननगरको महासेठ पोखरी,कोशी बैरेज, सखडाको छिन्नमस्ता पोखरी, भारदहको कंकालिनी मंदिरको पोखरी, कञ्चनरुप, रुपनी, अग्निसाइर कृष्णासावरण, बोदेबरसाइन, तिलाठी कोईलाडी लगायतका ठाउँका छठ घाटहरूमा व्रती र श्रद्धालुहरूको ठूलो भीड लागेको छ ।
चार दिनसम्म मनाइने यो महापर्वको आज तेस्रो दिनलाई ‘साँझी अघ्र्य’ भनिन्छ । भोलि बिहान ‘विहानिया अर्घ्य’का साथ व्रतको समापन हुनेछ ।
छठ पर्वमा महिलाहरूले चार दिनसम्म कठोर व्रत बस्ने, शुद्धता र अनुशासन पालना गर्ने चलन छ । अस्ताउँदो र उदाउँदो सूर्यलाई अघ्र्य दिँदै परिवार, समाज र राष्ट्रको सुख–समृद्धिको कामना गर्ने यो पर्व सद्भाव र एकताको प्रतीकका रूपमा मनाइन्छ ।