सहकार्यका लागि तयार छौं, मतभेद कार्यकर्ता स्तरमै सीमित: सीके राउत

ईमधेश न्यूज सम्वाददाता,
राजविराज, ०९ कार्तिक ।
 जनमत पार्टीका अध्यक्ष डा. सीके राउतले जनता समाजवादी पार्टी (जसपा) नेपालसँग आवश्यक परे सहकार्य गर्न तयार रहेको बताएका छन्। आइतबार प्रेस जनमत संघद्वारा आयोजित पत्रकार भेटघाट कार्यक्रममा राउतले शीर्ष नेताहरूबीच कुनै मतभेद नभएको स्पष्ट पार्दै भने, “जहाँ आन्दोलन गर्नुपर्छ, हामीसँगै गर्छौं, एक्लै होइन, मिलेर माग पूरा गर्न सकिन्छ।”
उनका अनुसार जसपा र जनमतबीच देखिने द्वन्द कार्यकर्ता स्तरमा मात्र सीमित छ। “माथि केही छैन, हामी सँगै बस्छौं, छलफल गर्छौं, तर तल कार्यकर्ताहरू आपसमा लड्छन्,” राउतले भने।
मधेशका केही युवाहरूले सामाजिक सञ्जालमा संघीयता खारेज गर्नुपर्ने अभिव्यक्ति दिइरहेको उल्लेख गर्दै उनले त्यसलाई लहैलहै र भ्रमको परिणाम भने। “संघीयता खारेज गर्नुपर्ने तर्क छैन, फेसबुकका पोस्ट हेरेर मात्र कुरा गरिन्छ,” उनले स्पष्ट पारे।