निर्धारित समयमा संसद् भवन निर्माण नसकिए जरिवाना तिराउने चेतावनी: मन्त्री घिसिङ

ईमधेश न्यूज सम्वाददाता,
काठमाडौं, ०८ कात्तिक ।
ऊर्जा, भौतिक पूर्वाधार तथा सहरी विकासमन्त्री कुलमान घिसिङले निर्माणाधीन सङ्घीय संसद् भवनको काम निर्धारित समयभित्र पूरा नभए निर्माण कम्पनीलाई जरिवाना तिराउने चेतावनी दिएका छन्।
शनिबार सिंहदरबार परिसरमा संसद् भवनको स्थलगत निरीक्षण गर्दै मन्त्री घिसिङले पाँचौँ पटक थप गरिएको म्याद — २०८२ पुस १६ गते — भित्र काम नसकिए कानूनी रूपमा हर्जाना तिराउनुपर्ने स्थिति आउने स्पष्ट पारे।
२०७६ असोज १६ गते तीन वर्षभित्र निर्माण सम्पन्न गर्ने गरी सम्झौता भए पनि काम समयमै अघि नबढेकाले म्याद पाँच पटकसम्म बढाइएको छ। उनले दैनिक कार्यतालिका बनाएर काममा तीव्रता ल्याउन निर्देशन दिँदै भने, “अब संसद् भवन समयमै सक्नैपर्छ, आवश्यक परे दुई सिफ्टमा काम गर्नुस्।”
मन्त्री घिसिङले राष्ट्रिय सभा र आगामी निर्वाचनपछि प्रतिनिधिसभा बैठक नयाँ भवनबाट सञ्चालन गर्नुपर्ने बताए।
१२ वटा ब्लक समेटिएको नयाँ संसद् भवनमा दुवै सदनका सभा कक्ष, संसदीय समितिका कार्यालय र दलका कक्षहरू रहनेछन्। जेन–जी आन्दोलनका क्रममा पुरानो संसद् भवन क्षतिग्रस्त भएपछि सरकारले नयाँ भवन निर्माणलाई प्राथमिकताका साथ अघि बढाएको हो।