सप्तरीको सकरपुरामा छठ मेला र सांस्कृतिक कार्यक्रम हुने

राजविराज । छठ पूजाको अवसरमा सप्तरीको तिलाठी कोइलाडी गाउँपालिका–३ सकरपुरामा मेला तथा सांस्कृतिक कार्यक्रमको आयोजना गरिने भएको छ। शनिबारदेखि सुरु हुने उक्त कार्यक्रम चार दिनसम्म चल्ने आयोजक समितिले जनाएको छ। कार्यक्रमको पहिलो दिन शनिबार मूर्ति पूजा तथा नाटक प्रदर्शनी हुने भएको छ। समितिका संयोजक उग्रकान्त झाले नाटकमा स्थानीय युवाहरूले नै अभिनय गर्ने बताए। आइतबार सांस्कृतिक कार्यक्रम, सोमबार जागरण तथा मंगलबार मूर्ति विसर्जन गरिनेछ। मेलाको उद्घाटन जनमत पार्टीका अध्यक्ष डा. सीके राउतले गर्ने कार्यक्रम रहेको आयोजक समितिका उपाध्यक्ष अशोक मण्डलले जानकारी दिए। छठ पर्वको अवसरमा आयोजना हुने यस मेला र सांस्कृतिक कार्यक्रमले स्थानीय सांस्कृतिक पहिचान र सामाजिक एकता झल्काउने अपेक्षा गरिएको छ।