ब्लु डायमन्डमा गुन्डाराजः संस्थाभित्रको सत्ता संघर्ष र समुदाय पीडित

ईमधेश न्युज सम्वाददता,
काठमाडौं, ०४ कार्तिक ।
समलिङ्गी, तेस्रोलिङ्गी, अन्तरलिङ्गी र दुईलिङ्गी व्यक्तिहरूको अधिकारका लागि सन् २००१ मा स्थापना भएको ब्लु डायमन्ड सोसाइटी (नील हिरा समाज) आजभोलि विवादमा छ। संस्थाभित्र पिंकी–मनिषा ढकाल समूहको नियन्त्रण, आर्थिक अपारदर्शिता र आन्तरिक दादागिरीबारे संस्थाका पूर्व सदस्य र कर्मचारीहरूले गम्भीर आरोप लगाएका छन्।
संस्थाका संस्थापक सदस्यका अनुसार, “निर्णय सधैं माथिबाट आउँछन्, हामीलाई सिग्नेचर मात्र गर्न लगाइन्छ। अध्यक्ष बदलिए पनि नियन्त्रण उही समूहको रहन्छ।” उनका भनाइअनुसार, हालका औपचारिक अध्यक्ष उमेश श्रेष्ठ (उमिशा) नाममात्रका हुन्, तर वास्तविक शक्ति पिंकी र कोइली समूहको हातमा छ।
उनीहरूका अनुसार, संस्थाको बजेट र अडिट मिलाउने, फन्ड बाँडफाँट र नियुक्ति सबै ठूला नेतामै सीमित छन्। “पिंकीले विभिन्न बैंकमा रकम राखेकी छिन्, चितवनमा जग्गा किनेर करोडौंको सम्पत्ति बनाएकी छिन्,” एक पूर्व कोषाध्यक्षले दाबी गरे।
संस्थाभित्रको विरोध दबाउन धम्की र पदबाट हटाउने अभ्यास भइरहेको पनि स्रोतको आरोप छ। “अधिकारका नाममा चल्ने संस्थाले आफ्नै कार्यकर्तालाई हेप्ने र निकाल्ने काम गर्छ,” उनले भने।
यता, ब्लु डायमन्ड सोसाइटीले भने यी आरोपहरू असत्य भएको दाबी गर्दै आएको छ। तर, संस्थाभित्रको असन्तुष्टि बढ्दै जाँदा समुदायभित्र नै विभाजन देखिन थालेको छ।
अधिकारका लागि बनेको संस्था आज पारदर्शिता र उत्तरदायित्वको प्रश्नमा आफैं विवादित बनेको छ।