जसपा नेपालको विधानविपरीत मधेश अधिवेशन बहिष्कार घोषणा

ईमधेश न्युज सम्वाददाता,
जनकपुरधाम, ३० असोज ्।
 जनता समाजवादी पार्टी (जसपा) नेपालका केही नेताहरूले मधेश प्रदेश अधिवेशनलाई विधानविपरीत सञ्चालन गरिएको भन्दै बहिष्कारको घोषणा गरेका छन्।
पूर्व मुख्यमन्त्री तथा मधेश प्रदेश संसदीय दलका नेता सरोज यादव, पूर्व अर्थमन्त्री सञ्जय यादव, प्रदेश सांसद शोभा साह, अनिरुद्ध यादव, पूर्व सांसद रामबाबु यादव लगायत बारा, रौतहट, धनुषा, सप्तरी र सर्लाहीका जिल्ला अध्यक्षहरू, साथै सिराहा, पर्सा र महोत्तरीका अधिकांश अधिवेशन प्रतिनिधिहरू सहभागी कार्यक्रममा अधिवेशन बहिष्कार गरिएको घोषणा गरिएको हो।
नेताहरूले अध्यक्ष पदका उम्मेदवार तथा पूर्व राज्यमन्त्री योगेन्द्र राय यादवको प्यानललाई पराजित गर्नका लागि नक्कली मतदाता प्रयोग गरिएको आरोप लगाएका छन्।
उनीहरूले पार्टी विधानविपरीत सर्लाहीमा ४८ जना, मनोनयनका रूपमा २५ जना र वर्गीय संगठनका धेरैजना अवैधानिक प्रतिनिधि समावेश गरिएको दाबी गर्दै, ती मत रद्द नगरिएसम्म अधिवेशनलाई “कर्मकाण्डी” भन्दै अस्वीकार गर्ने बताएका छन्।