पाँच दलको गठबन्धनबाट जितेन्द्र सोनल मुख्यमन्त्री दाबी

ईमधेश न्यूज सम्वाददाता,
जनकपुरधाम, २९ असोज ।
 मधेश प्रदेशमा पाँच दलको गठबन्धनले लोकतान्त्रिक समाजवादी पार्टी (लोसपा) का नेता जितेन्द्र सोनललाई मुख्यमन्त्री बनाउने दाबी पेश गरेको छ।
लोसपा, जनता समाजवादी पार्टी (जसपा) नेपाल, जनमत पार्टी, नेकपा (माओवादी केन्द्र) र नेकपा (एकीकृत समाजवादी) सम्मिलित गठबन्धनका नेताहरूले ५६ जना प्रदेशसभा सदस्यको हस्ताक्षरसहितको दाबीपत्र बुधबार प्रदेश प्रमुख सुमित्रा सुवेदी भण्डारीलाई बुझाएका हुन्।
मङ्गलबार मुख्यमन्त्री सतीश कुमार सिंहले पदबाट राजीनामा दिएपछि प्रदेश प्रमुखले नयाँ सरकार गठनका लागि बुधबार दिउँसो ४ बजेसम्म दाबी पेश गर्न आह्वान गरेकी थिइन्।
गठबन्धनका नेताहरूका अनुसार, लोसपाको नेतृत्वमा नयाँ सरकार गठन गर्ने सहमति हिजो राति र आज बिहान बसेका बैठकहरूबाट भएको हो। सोनलको नेतृत्वमा सरकार बनाउने विषयमा सहमति जुटे पनि मन्त्रालयको भागबण्डा भने अझै टुंगोमा पुगेको छैन।