जनकपुरधाममा जसपा मधेश प्रदेश समितिको एकताको प्रथम अधिवेशन सुरु

ईमधेश न्यूज सम्वाददाता,
जनकपुरधाम, २७ असोज ।
 जनता समाजवादी पार्टी (जसपा) नेपाल मधेश प्रदेश समितिको एकताको प्रथम अधिवेशन मधेश प्रदेशको राजधानी जनकपुरधाममा सुरु भएको छ । अधिवेशन जसपा मधेश प्रदेश समितिका अध्यक्ष बालकिशोर यादवको अध्यक्षतामा र पार्टीका राष्ट्रिय अध्यक्ष माननीय उपेन्द्र यादवको प्रमुख आतिथ्यमा सभ्य र भव्य रूपमा सम्पन्न भएको हो ।
उद्घाटन समारोहमा जसपाका केन्द्रीय सदस्य, प्रदेश पदाधिकारी, जनप्रतिनिधि, जिल्ला इन्चार्ज तथा विभिन्न क्षेत्रका प्रतिनिधिहरूको उल्लेखनीय उपस्थिति रहेको थियो । कार्यक्रममा बोल्दै अध्यक्ष यादवले जसपाको एकतालाई सुदृढ पार्दै मधेश प्रदेशमा सुशासन, समान अधिकार र समृद्धिको अभियानलाई नयाँ ऊर्जा दिने बताए ।
राष्ट्रिय अध्यक्ष उपेन्द्र यादवले अधिवेशनलाई ऐतिहासिक अवसरका रूपमा व्याख्या गर्दै जसपाको विचार, संगठन र आन्दोलनलाई नयाँ दिशा दिने प्रतिबद्धता जनाए । उनले भने, “हामीले मधेश मात्र होइन, समग्र नेपालका सीमान्तकृत समुदायको अधिकारका लागि यो एकतालाई सशक्त रूपले अगाडि बढाउँछौं।”
अधिवेशनमा पार्टीभित्रको संगठन विस्तार, आगामी राजनीतिक रणनीति, नीति तथा कार्यक्रमका विषयमा विस्तृत छलफल हुने बताइएको छ । जसपाले हालै राष्ट्रिय एकता प्रक्रियालाई तीव्र बनाउँदै प्रदेश र स्थानीय तहमा संगठन पुनर्संरचना गरिरहेको छ ।
जनकपुरधाममा सुरु भएको यो अधिवेशनलाई मधेश प्रदेशको राजनीतिक सन्तुलन, एकता र सहकार्यको दृष्टिले महत्वपूर्ण कदमका रूपमा हेरिएको छ ।