कोटेश्वरमा ‘जेन्जी चोक’ घोषणा कार्यक्रममाथि प्रहरी हस्तक्षेप, प्रवक्ता अविन लिम्बू पक्राउ

ईमधेश न्यूज सम्वाददाता,
काठमाडौँ, २७ असोज ।
 राजधानीको कोटेश्वर तीनकुने क्षेत्रमा आइतबार आयोजित ‘जेन्जी चोक’ घोषणा कार्यक्रममा प्रहरीले हस्तक्षेप गरेको छ। प्रहरी हस्तक्षेपपछि जेन्जी २.० (सवै पुस्ताको प्रतिनिधि) का प्रवक्ता अविन लिम्बू, अरिश तिवारी र सुनील सिंहलाई पक्राउ गरिएको आयोजकले जनाएको छ।
जेन्जी २.० ले तीनकुने चोकलाई ‘जेन्जी चोक’ घोषणा गर्दै सार्वजनिक रूपमा साइनबोर्ड राख्ने तयारी गरेको थियो। ‘रगत बग्यो देशका लागि, अब रक्षा हाम्रो जिम्मेबारी’ भन्ने नारासहित तयार गरिएको साइनबोर्डमा नेपालको झण्डा, आन्दोलनका क्रममा भाइरल भएको रगताम्य जुता, र जेन्जी २.० को नाम उल्लेख गरिएको थियो। तर, कार्यक्रम सुरु हुनुअघि नै प्रहरीले स्थलमै पुगेर बोर्ड हटाएको र सहभागीहरूलाई नियन्त्रणमा लिएको हो।
कार्यक्रम आयोजक समितिका सल्लाहकार डा. हरिबहादुर कार्कीका अनुसार कार्यक्रममा प्रशासनबाट अनुमति लिएर मात्रै कार्यक्रम गरिएको थियो। “हामीले अनुमति लिएर दीप प्रज्ज्वलन र चोक घोषणा गर्न लागेको थियौं, तर प्रहरीले अनावश्यक हस्तक्षेप गरी बोर्ड खोसियो र प्रवक्ता लिम्बूसहितलाई पक्राउ ग¥यो,” उनले भने।
तर, काठमाडौं प्रहरी परिसरका अधिकारीले भने कार्यक्रमको अनुमति दीप प्रज्ज्वलनका लागि मात्र भएको र जिल्ला प्रशासन कार्यालयको आदेशविपरीत ‘सार्वजनिक प्रदर्शन’ गर्न खोजेकाले पक्राउ गरिएको बताएका छन्। उनका अनुसार काठमाडौं उपत्यकामा हाल कुनै पनि प्रकारको राजनीतिक सभा वा प्रदर्शन गर्न नपाइने आदेश जारी छ।
जेन्जी २.० का सदस्यहरूका अनुसार, उक्त चोक घोषणा कार्यक्रम जेन्जी आन्दोलनका शहीदहरूको सम्झनामा गरिएको थियो। “शहीदहरूको बलिदानलाई सम्झने र उनीहरूको अधुरा माग पूरा गराउने हाम्रो प्रतिबद्धता हो,” आयोजकहरूले भने। कार्यक्रममा शहीद परिवार, घाइते सदस्य, अभियन्ता र समर्थकहरूको बाक्लो उपस्थिति थियो।
सोही अवसरमा जेन्जी २.० (सवै पुस्ताको प्रतिनिधि) ले राष्ट्रिय समिति गठन गरेको पनि घोषणा गरेको छ। समूहको आधिकारिक कार्यालय काठमाडौंको महाराजगञ्जमा रहेको जनाएको छ।
यस घटनापछि जेन्जी २.० का समर्थकहरूले प्रहरीको कार्यप्रति आपत्ति जनाउँदै आन्दोलनको तयारी थालेका छन्।