जेन–जी सहिद सन्तानका लागि काठमाडौं युरो स्कूलको पूर्ण छात्रवृत्ति घोषणा

ईमधेश न्यूज सम्वाददाता,
काठमाडौँ २२ असोज ।
 गोंगबु–बनियाटारस्थित काठमाडौं युरो आईबी वल्र्ड स्कूलले जेन–जी आन्दोलनका सहिद परिवारका बालबालिकालाई पूर्ण छात्रवृत्तिमा अध्ययन गराउने घोषणा गरेको छ।
विद्यालयले परिवर्तनका लागि ज्यान आहुति दिने सहिदहरूको सम्मानमा उनीहरूको सन्तानलाई निःशुल्क अध्ययनको अवसर दिने निर्णय गरेको हो। विद्यालयका अध्यक्ष प्रमोद पाण्डेले सहिदहरूको बलिदानलाई सम्मान गर्दै विद्यालयको सामाजिक उत्तरदायित्वअन्तर्गत यो पहल गरिएको बताए।
“शिक्षा नै सशक्तिकरणको माध्यम हो। लोकतन्त्रका लागि जीवन अर्पण गर्ने सहिदहरूको सपना साकार पार्ने हाम्रो सानो प्रयास हो,” अध्यक्ष पाण्डेले भने।
विद्यालयले सहिद परिवारका अभिभावक वा नातेदारलाई आवश्यक प्रमाणसहित विद्यालयमा सम्पर्क गर्न आग्रह गरेको छ।
यसअघि पनि विद्यालयले सामाजिक उत्तरदायित्वका विभिन्न कार्यक्रम सञ्चालन गर्दै आएको जनाएको छ। सहिद सन्तानका लागि सुरु गरिएको यो छात्रवृत्ति कार्यक्रम अन्य शैक्षिक संस्थाका लागि पनि प्रेरणादायी बन्ने विद्यालयको विश्वास छ।