जसपा नेपालको केन्द्रीय समिति बैठक ः आन्दोलन मूल्याङ्कन, भ्रष्टाचार छानबिन र संगठन सुदृढीकरणमा जोड

लिलाकान्त यादव,
काठमाडौं, ०७ असोज ।
 जनता समाजवादी पार्टी (जसपा) नेपालको केन्द्रीय कार्यकारिणी समितिको बैठक २०८२ असोज ५ गते अध्यक्ष उपेन्द्र यादवको अध्यक्षतामा बसेको छ । बैठकले हालैको न्भल–श् आन्दोलन, विगतका आन्दोलनहरू, देशको राजनीतिक अवस्था र पार्टीको आगामी कार्यदिशा सम्बन्धमा विस्तृत निर्णय गरेको छ ।
बैठकले २००७ सालदेखि हालसम्म भएका प्रमुख आन्दोलन र ऐतिहासिक परिवर्तनहरूको समीक्षा गर्दै, नेपाली कांग्रेस र कम्युनिस्ट नेतृत्वका सरकारहरू भ्रष्टाचार, बेरोजगारी, असमानता र कुशासन अन्त्य गर्न असफल भएको ठहर गरेको छ । बैठकले विगतका सरकारले महंगी, कमिशनतन्त्र, उद्योग धन्दा बन्द, वैदेशिक रोजगारीमा निर्भरता र शिक्षा–स्वास्थ्यमा असमान पहुँच जस्ता समस्यालाई झन् गहिरो बनाएको निष्कर्ष निकालेको छ ।
२०८२ भदौ २३ र २४ गते भएको न्भल–श् युवा आन्दोलनको सन्दर्भमा जसपाले सरकारले दमनकारी नीति अपनाएको आरोप लगाएको छ । बैठकले आन्दोलनका क्रममा दर्जनौं युवाको मृत्यु, हजारौं घाइते र खरबौंको सम्पत्ति नष्ट भएकोमा गम्भीर चिन्ता व्यक्त गर्दै, यसबारे उच्चस्तरीय न्यायिक छानबिन आयोग गठन गर्न माग गरेको छ । साथै, आन्दोलनमा सहभागी युवाले उठाएका मागहरू जसपाको एजेन्डासँग मेल खाने भएकाले पार्टीले ती मागलाई निरन्तर उठाउने प्रतिबद्धता जनाएको छ ।
बैठकले आन्दोलनका क्रममा तोडफोड र आगजनीबाट नष्ट भएका सार्वजनिक तथा निजी सम्पत्तिको पुनर्निर्माणमा पहल गर्ने निर्णय गरेको छ । साथै, भ्रष्टाचार सम्बन्धी विगतका सबै काण्डहरूको छानबिन गरी दोषीलाई कानूनी कठघरामा ल्याउनुपर्ने ठहर गरेको छ ।
राजनीतिक कार्यनीतिका सन्दर्भमा जसपाले संविधान संशोधन वा पुनर्लेखनमार्फत मात्र संघीयता, समावेशिता, सामाजिक न्याय र पहिचानका सवाल सम्बोधन गर्न सकिने भन्दै निर्वाचन प्रणाली सुधार र समान जनसंख्या आधारमा निर्वाचन क्षेत्र निर्धारण गर्नुपर्ने माग दोहोर्याएको छ । महिला, दलित, मधेशी, आदिवासी, मुस्लिमलगायत सिमान्तकृत समुदायका लागि आरक्षित निर्वाचन क्षेत्र र समानुपातिक पहुँच सुनिश्चित गर्नुपर्ने निर्णय पनि बैठकले गरेको छ ।
संगठनात्मक पक्षमा बैठकले दशैंपछि प्रदेश अधिवेशन, जिल्ला र बुथ तहसम्मको संरचना निर्माण, सदस्य परिचालन र प्रशिक्षण अभियान सञ्चालन गर्ने निर्णय गरेको छ । निर्वाचन लक्षित गतिविधिमा उम्मेदवार छनोट, प्रचारप्रसार, आर्थिक व्यवस्थापन, स्वयंसेवक परिचालन र मतदाता सचेतनामूलक कार्यक्रमलाई उच्च प्राथमिकता दिने उल्लेख गरिएको छ ।
बैठकले पार्टी एकता र सहकार्यबारे समेत निर्णय गर्दै समान विचार र एजेन्डा भएका दलसँग एकता खोज्ने तथा समान मुद्दा भएका दलसँग कार्यगत सहकार्य गर्ने तयारी गर्ने जनाएको छ । संघीय लोकतान्त्रिक मोर्चालाई अझै सशक्त बनाएर प्रतिगमनकारी शक्तिलाई परास्त गर्ने निष्कर्ष पनि बैठकले निकालेको छ ।
बैठकले अन्त्यमा आन्दोलनका क्रममा शहादत प्राप्त गरेका युवाप्रति श्रद्धाञ्जली अर्पण गर्दै घाइतेहरूको स्वास्थ्यलाभको कामना गरेको छ । साथै, शहीद परिवारप्रति गहिरो समवेदना प्रकट गर्दै उनीहरूको योगदानलाई स्मरण गर्ने निर्णय गरेको छ ।
 यसरी जसपा नेपालको बैठकले देशको राजनीतिक संकट, भ्रष्टाचार, असमानता र न्भल–श् आन्दोलनको प्रभावलाई समेट्दै आगामी दिनका लागि पार्टीको स्पष्ट कार्यदिशा तय गरेको छ ।