संविधान दिवस, २०८२ मा उपराष्ट्रपति यादवको शुभकामना सन्देश

लिलाकान्त यादव,
काठमाडौं, ०२ असोज । 
उपराष्ट्रपति रामसहाय प्रसाद यादवले संघीय लोकतान्त्रिक गणतन्त्र नेपालको संविधान दिवस, २०८२ का अवसरमा शुभकामना सन्देश दिँदै सबै नेपालीलाई शान्ति, समृद्धि र एकताको कामना गरेका छन् ।
उनले संविधानलाई नेपाली जनताको दीर्घ संघर्ष र ऐतिहासिक उपलब्धि बताउँदै यसले बहुजातीय, बहुभाषिक, बहुधार्मिक र बहुसांस्कृतिक समाजलाई एकताको सूत्रमा बाँधेको उल्लेख गरे । हालैको ‘जेन–जी’ आन्दोलनको सम्बोधन र अन्तरिम सरकार गठनले संविधानको लचकता र समावेशी चरित्र पुष्टि गरेको उनले सन्देशमा उल्लेख गरेका छन् ।
उपराष्ट्रपति यादवले संविधान दिवसलाई सहिद, अग्रज, जनप्रतिनिधि र नागरिकप्रति श्रद्धा प्रकट गर्ने दिनका रूपमा मनाउनुपर्नेमा जोड दिएका छन् । साथै, संविधानको मर्मअनुसार मौलिक हकहरूको कार्यान्वयन, संघीय संरचनाको सुदृढीकरण र प्रदेश–स्थानीय तहलाई अधिकार सम्पन्न बनाउन सबैको सक्रियता आवश्यक भएको बताए ।
संविधान दिवसले प्रत्येक नेपालीलाई स्वदेशमै सम्मानजनक रोजगारीको अवसर प्राप्त होस् र राष्ट्र सामाजिक न्याय र समृद्धिको बाटोमा अघि बढोस् भन्ने विश्वास व्यक्त गर्दै उनले ज्ञात–अज्ञात सहिदलाई श्रद्धाञ्जली अर्पण र घाइते तथा अपाङ्ग भएकाप्रति सम्मान प्रकट गरेका छन् ।