मुख्यमन्त्री सिंहविरुद्ध जनमत पार्टीको कारबाही सिफारिस

मधेश न्युज सम्वाददाता,
राजविराज, ०२ असोज ।
मधेश प्रदेशका मुख्यमन्त्री सतिशकुमार सिंहले पदबाट राजीनामा नदिएपछि जनमत पार्टी मधेश प्रदेश संसदीय दलले पार्टीको केन्द्रीय समितिमा अनुशासनात्मक कारबाहीको सिफारिस गरेको छ।
संसदीय दलका नेता महेशप्रसाद यादवका अनुसार सिंहलाई २४ घण्टाभित्र स्पष्टीकरण मागिए पनि जवाफ नदिएपछि बुधबार बसेको बैठकले कारबाही सिफारिस गर्ने निर्णय गरेको हो। यादवले आजै यसबारे पार्टीलाई पत्राचार गरिएको जानकारी दिए।
कानुनी प्रावधानअनुसार पार्टीले कारबाही गरे सिंहको सांसद पदसमेत जानेछ र उनी स्वतः मुख्यमन्त्रीबाट पदमुक्त हुनेछन्।
२४ भदौमा जेन–जी आन्दोलनका क्रममा पार्टीको निर्देशनअनुसार सिंहले सामाजिक सञ्जालमार्फत राजीनामा घोषणा गरेका थिए। तर औपचारिक राजीनामा दिन अस्वीकार गरेपछि कारबाहीको बाटो रोजिएको हो।
संसदीय दलले सिंहसहित सरकारमा रहेका आफ्ना मन्त्रीहरूलाई फिर्ता बोलाउँदै मधेश सरकारलाई दिएको समर्थनसमेत फिर्ता लिएको प्रदेश प्रमुखको कार्यालय र प्रदेश सभा सचिवालयलाई जानकारी गराइसकेको छ।