उपराष्ट्रपति यादवद्वारा जेनजी आन्दोलनमा मृत्यु हुने प्रति गहिरो दुःख, संयमता र सहकार्यको आग्रह

ईमधेश न्युज सम्वाददाता,
काठमाडौँ, २४ भाद्र । 
 सोमबार देशभर चलेको ‘जेनरेसन जेड’ (जेनजी) आन्दोलनका क्रममा नागरिकको ज्यान गएको घटनाले देशैभर आक्रोश र पीडा सिर्जना गरेको छ। यसै सन्दर्भमा उपराष्ट्रपति रामसहाय प्रसाद यादवले गहिरो दुःख प्रकट गर्दै मृतकप्रति श्रद्धाञ्जली अर्पण गरेका छन्। उनले शोकसन्तप्त परिवारजनप्रति समवेदना व्यक्त गर्दै घाइतेको शीघ्र स्वास्थ्य लाभको कामना गरेका छन्।
उपराष्ट्रपतिले मृतकको आत्माको चिरशान्तिको कामना गर्दै पीडित परिवारलाई धैर्य, साहस र आत्मबल प्राप्त होस् भन्ने शुभकामना दिएका छन्। साथै, उनले सरकार र सम्बन्धित निकायलाई घाइतेहरूको निःशुल्क र तुरुन्त उपचार सुनिश्चित गर्न आग्रह गरेका छन्। उनले उल्लेख गरेका छन् कि लोकतान्त्रिक मूल्यको मूल आधार नागरिकको स्वतन्त्र अभिव्यक्ति र शान्तिपूर्ण प्रदर्शन हो, र यस अधिकारलाई कुण्ठित गर्ने कुनै पनि गतिविधि स्वीकार्य हुन सक्दैन।
“जनताको अभिव्यक्ति र सहभागिताको अधिकार सुनिश्चित गरिने लोकतान्त्रिक मूल्यमा विश्वास राख्ने हामी सबैका लागि नागरिकको निधन अत्यन्त पीडादायक र मर्मस्पर्शी घटना हो,” उपराष्ट्रपतिले भनेका छन्। यस किसिमका घटनाबाट गहिरो पाठ सिक्नुपर्ने आवश्यकता औंल्याउँदै उनले आगामी दिनमा यस्ता घटनाको पुनरावृत्ति रोक्न सबै पक्ष संवेदनशील, उत्तरदायी र सचेत बन्नुपर्नेमा जोड दिएका छन्।
उपराष्ट्रपतिले शान्तिपूर्ण अभिव्यक्ति र आन्दोलन लोकतन्त्रको मेरुदण्ड भएको उल्लेख गर्दै नागरिकको मागलाई गम्भीरतापूर्वक सम्बोधन गर्न सरकार, राजनीतिक दल तथा सरोकारवालालाई आह्वान गरेका छन्। उनले देश र समाजमा शान्ति, सद्भाव र सहकार्यको वातावरण कायम राख्न सबैको साझा जिम्मेवारी रहेको बताए।
यादवले विशेष रूपमा युवापुस्ताको आन्दोलनलाई सकारात्मक रूपमा लिन सुझाव दिँदै शान्तिपूर्ण संवाद र सहमतिको बाटो रोज्नुपर्ने औंल्याएका छन्। उनका अनुसार आन्दोलनले देखाएको आक्रोशलाई राजनीतिक समाधानमार्फत सम्बोधन गर्न सकियो भने लोकतन्त्र अझ सबल बन्नेछ।
उपराष्ट्रपतिले नागरिकहरूलाई सार्वजनिक सम्पत्ति जोगाउन, आपसी समझदारी कायम गर्न र राष्ट्रको स्थायित्व तथा समृद्धिको यात्रामा योगदान पु¥याउन अनुरोध गरेका छन्। उनले भने, “शान्ति र मानवताको पक्षमा हामी सबै एकजुट रहौं।”
यादवको वक्तव्यले जेनजी आन्दोलनको ऐतिहासिक महत्व, लोकतान्त्रिक मूल्य र सामाजिक जिम्मेवारीबीचको सन्तुलन स्थापित गर्ने प्रयास गरेको छ। शान्तिपूर्ण आन्दोलन, नागरिकको सहभागिता र संवादमार्फत समस्या समाधान गर्नुपर्छ भन्ने संदेश यसले दिएको छ।
देशभरको युवा वर्ग र जनताले ऐतिहासिक रूपमा देखाएको सक्रियता र चेतनालाई सकारात्मक दिशा दिने, हिंसा र विनाशबाट टाढा राख्ने जिम्मेवारी सबै नागरिक र सरोकारवालामा रहेको यादवले जोड दिएका छन्। यसरी संयम, सहकार्य र जिम्मेवार नेतृत्वको माध्यमबाट मात्र मुलुकमा स्थायित्व, समृद्धि र लोकतान्त्रिक मूल्यहरू सुदृढ गर्न सकिने बताइएको छ।