सप्तरीको राजविराज क्षेत्रमा कफ्र्यू आदेश जारी

लिलाकान्त यादव,
राजविराज, २४ भाद्र ।
 सप्तरी जिल्लामा उत्पन्न परिस्थितिलाई नियन्त्रणमा लिन जिल्ला प्रशासन कार्यालयले मंगलबार दिउँसोदेखि अनिश्चितकालीन कफ्र्यू आदेश जारी गरेको छ। जिल्ला सुरक्षा समिति बैठकको निर्णयअनुसार मिति २०८२ भदौ २४ गते दिउँसो ३ः३० बजेदेखि अर्को आदेश नभएसम्म कफ्र्यू लागू हुने जनाइएको छ।
प्रमुख जिल्ला अधिकारी टुवराज पोखरेल द्वारा जारी आदेशअनुसार कफ्र्यू अवधिभर राजविराज नगरपालिका र बिष्णुपुर गाउँपालिका क्षेत्रभित्र तोकिएका सीमाभित्र कुनै पनि व्यक्तिले आवतजावत, भेला, जुलुस, प्रदर्शन, सभा, बैठक वा घेराउ गर्न पाउने छैनन्।
कफ्र्यू आदेशले तोकेको सीमा उत्तरतर्फ रुपनी मोडदेखि, पूर्वतर्फ बजरंगबली मन्दिर कंचनपुर रोड हुँदै कोशी कर्नेल पम्प नहरसम्म, दक्षिणतर्फ कोशी ब्यारेजबाट छुटिएको बरी नहरसम्म र पश्चिमतर्फ बरही नहर चौक हुँदै छिन्नमस्ता मन्दिर रोड तथा पुलचौक जोड्ने सडकसम्म रहेका छन्।
जिल्ला प्रशासन कार्यालयले स्थानीय प्रशासन ऐन २०२८ को दफा ६ (क) बमोजिम कफ्र्यू लागू गरिएको जनाएको छ। कफ्र्यू उल्लंघन गर्ने व्यक्तिमाथि कानूनी कारबाही हुने चेतावनी पनि दिइएको छ।
सुरक्षा समितिले पछिल्ला दिनमा भइरहेको तनाव र असुरक्षित अवस्थालाई मध्यनजर गर्दै शान्ति–सुरक्षा कायम राख्न यस्तो कदम चालिएको जनाएको छ।