उपराष्ट्रपतिबाट कुमारी इन्द्रजात्रा र अनन्त चतुर्दशीको शुभकामना

लिलाकान्त यादव,
काठमाडौं, २१ भाद्र ।
उपराष्ट्रपति रामसहाय प्रसाद यादवले कुमारी इन्द्रजात्रा र अनन्त चतुर्दशी (अनवत) पर्व २०८२ का अवसरमा देश–विदेशमा रहेका सम्पूर्ण नेपाली दिदीबहिनी तथा दाजुभाइमा हार्दिक मंगलमय शुभकामना व्यक्त गरेका छन्।
उनले इन्द्रजात्रालाई नेपालको मौलिक र विशिष्ट सांस्कृतिक धरोहरका रूपमा वर्णन गर्दै जीवित देवी कुमारी, इन्द्र, गणेश, भैरव, देवी लक्ष्मी र भगवान विष्णुको पूजा–आराधना गर्ने परम्पराले धार्मिक आस्था, सांस्कृतिक पहिचान र राष्ट्रिय एकतालाई बलियो बनाएको बताए। कुमारीको रथयात्रा, लिङ्गो ठड्याउने परम्परा, भैरव–गणेश नाचजस्ता प्रस्तुतिले नेपाललाई सांस्कृतिक विविधता र सामूहिक एकताको सन्देश दिने माध्यम भएको उनको भनाइ छ।
उपराष्ट्रपतिले कुमारीलाई शक्ति र पवित्रताको प्रतीकका रूपमा श्रद्धा गर्ने परम्पराले नेपाली समाजलाई आफ्नो गौरवशाली इतिहास र परम्परामाथि गर्व गर्न प्रेरित गर्ने उल्लेख गरे। साथै, इन्द्रजात्रा हेर्न विभिन्न समुदायको सहभागिताले सामाजिक सद्भाव र भाइचारामा योगदान पु¥याउने बताए।
त्यस्तै, उनले आजकै दिन तराई–मधेशमा मनाइने अनन्त चतुर्दशी पर्वको महत्व पनि स्मरण गरे। भगवान विष्णुको प्रतीकस्वरूप १४ गाँठो भएको अनन्त सूत्र बाँध्ने परम्पराले श्रद्धालुहरूलाई सुख, शान्ति, समृद्धि र संकटमोचनको विश्वास दिलाउने बताए।
उपराष्ट्रपति यादवले यी पर्व र जात्राले धार्मिक सहिष्णुता, पारस्परिक सद्भाव, भ्रातृत्व र राष्ट्रिय एकतालाई सुदृढ गर्ने विश्वास व्यक्त गर्दै सबै नेपालीमा सुख, शान्ति, समृद्धि र प्रगतिका शुभकामना दिएका छन्।