उपराष्ट्रपतिद्वारा मुहम्मद जयन्तीको शुभकामना

लिलाकान्त यादव,
काठमाडौं, २० भाद्र ।
उपराष्ट्रपति रामसहाय प्रसाद यादवले इस्लाम धर्मका अन्तिम ईशदूत हजरत मुहम्मद (सल्ल.) को १५००औँ जन्मजयन्ती (मुहम्मद दिवस) को अवसरमा देश–विदेशमा रहेका सम्पूर्ण मुस्लिम समुदायलाई हार्दिक शुभकामना दिएका छन्।
उपराष्ट्रपति यादवले शुभकामना सन्देशमा मुहम्मद जयन्तीले सत्य, करुणा, सहिष्णुता, सदाचार र सामाजिक समरसताको बाटोमा अघि बढ्न सबैलाई प्रेरणा दिने विश्वास व्यक्त गरे। उनले यस पर्वले धार्मिक सहिष्णुता, आपसी सद्भाव, भाइचारा र सामाजिक एकतालाई अझ बलियो बनाउन सहयोग गर्ने बताए।
नेपाल बहुजातीय, बहुभाषिक, बहुधार्मिक र बहुसांस्कृतिक मुलुक भएकाले यहाँ मनाइने पर्व, जयन्ती र दिवसहरूले समाजलाई एकताको धागोमा बाँध्ने र सामाजिक संरचनालाई सुदृढ बनाउन महत्वपूर्ण भूमिका खेल्ने उनको भनाइ छ। उनले मुहम्मद जयन्ती केवल धार्मिक मात्र नभई सामाजिक, सांस्कृतिक र नैतिक दृष्टिले पनि विशेष महत्व बोकेको बताए।
उनले हजरत मुहम्मदका उपदेशहरूलाई आत्मसात गर्न आग्रह गर्दै सत्य बोल्ने, इमानदारीपूर्वक आचरण गर्ने, गरीब, असहाय, अनाथ र विपन्नलाई सहयोग गर्ने, धैर्य र क्षमा गर्ने तथा मानव समाजलाई न्याय र सेवाभावमा अघि बढाउने मार्गमा यो जयन्तीले प्रेरणा दिने उल्लेख गरे।
उपराष्ट्रपति यादवले मुहम्मद जयन्तीले आत्मशुद्धि, संयम, आध्यात्मिक अनुशासन र मानवीय मूल्यलाई बलियो बनाउन योगदान पु¥याउने विश्वास व्यक्त गर्दै सबैमा सुख, शान्ति, समृद्धि र प्रगतिका लागि शुभकामना दिएका छन्।