भाषा आयोगको विज्ञप्ति : इम्बोस्ड नम्बर प्लेट देवनागरी लिपिमा राख्न आग्रह

काठमाडौं, भदौ १७ – नेपाल सरकारको निर्णयअनुसार आउँदो असोज १ गतेदेखि सबै सवारी साधनमा अंग्रेजी भाषा र रोमन लिपिमा विद्युतीय सङ्केत सङ्ख्या (इम्बोस्ड नम्बर प्लेट) अनिवार्य जडान गर्नुपर्ने व्यवस्था गरिएको छ। उक्त निर्णयप्रति भाषा आयोगले गम्भीर ध्यानाकर्षण गराएको छ। आयोगले विज्ञप्तिमार्फत संविधानको धारा ७ को उपधारा १ मा देवनागरी लिपिमा लेखिने नेपाली भाषा सरकारी कामकाजको भाषा हुने स्पष्ट व्यवस्था भएको स्मरण गराउँदै अङ्ग्रेजी भाषा र रोमन लिपि प्रयोग गर्नु संविधानविपरीत हुने बताएको छ। यसअघि पनि आयोगले सरकारले देवनागरी लिपिमा सङ्केत सङ्ख्या राख्नुपर्ने आवश्यकता औँल्याएको थियो। यस्तै, सर्वोच्च अदालतको २०८१ असार ९ गतेको फैसलामा समेत भाषासम्बन्धी अन्य विषय भाषा आयोगको सिफारिसमा सरकारले निर्णय गर्न सक्ने संवैधानिक व्यवस्था रहेको स्पष्ट भएको आयोगले जनाएको छ। आयोगको २०८२ भदौ १ गतेको बैठकको निर्णयअनुसार भाषा आयोगले देवनागरी लिपिमा नै विद्युतीय सङ्केत सङ्ख्या राख्न पुनः नेपाल सरकारको ध्यानाकर्षण गराएको हो।