विद्यार्थी संगठनद्वारा शिक्षा ऐन सुधारको माग गर्दै चरणबद्ध आन्दोलन घोषणा

काठमाडौं, भाद्र १६ – विद्यार्थीकाे हितमा नयाँ शिक्षा ऐन जारी गर्न माग गर्दै विभिन्न संयुक्त विद्यार्थी संगठनहरूले आज पत्रकार सम्मेलनमार्फत आगामी दिनका लागि चरणबद्ध आन्दोलन कार्यक्रम घोषणा गरेका छन्। संगठनहरूले भोलिदेखि विभिन्न तहमा ज्ञापनपत्र पेश, अन्तरक्रिया तथा रचनात्मक प्रदर्शन गर्दै आन्दोलनलाई अघि बढाउने जानकारी दिएका छन्। आन्दोलन कार्यक्रमअनुसार, भाद्र १७ र १८ का दिन राष्ट्रपति, प्रधानमन्त्री, प्रतिनिधिसभा सभामुख, राष्ट्रियसभा अध्यक्ष र शिक्षामन्त्रीलाई ज्ञापनपत्र पेश गरिनेछ। भाद्र १९ का दिन राजनीतिक दलका शिक्षा विभाग प्रमुख र पूर्व विद्यार्थी अध्यक्षहरू सहित वृहत अन्तरक्रिया आयोजना हुनेछ। विद्यार्थीहरूले भाद्र २० र २२ मा निशुल्क शिक्षाका लागि हस्ताक्षर संकलन, प्रचारप्रसार र रचनात्मक प्रदर्शन गर्ने योजना बनाएका छन् भने भाद्र २३ मा देशव्यापी सीडीओ कार्यालयमार्फत प्रधानमन्त्री र शिक्षामन्त्रीलाई ज्ञापनपत्र पेश गरिनेछ। अन्ततः भाद्र २४ मा देशव्यापी बृहत् विद्यार्थी प्रदर्शन गर्ने कार्यक्रम तय गरिएको छ। संयुक्त विद्यार्थी संगठनहरूले नयाँ शिक्षा ऐनले विद्यार्थी अधिकार र गुणस्तरीय शिक्षालाई सुनिश्चित गर्ने आशा व्यक्त गर्दै सबै सरोकारवालासँग संवाद र सहकार्यका लागि तयार रहेको बताएका छन्।