सप्तरीमा विवाहको दुई महिनामै युवतीको शंकास्पद मृत्यु, दाइजो नदिँदा हत्या गरेको आरोप

ईमधेश न्यूज सम्वाददाता,
राजविराज, १५ भाद्र ।
सप्तरीको महादेवा गाउँपालिका–१ सोनरा टोलमा विवाह भएको दुई महिनामै २१ वर्षीया दीपाकुमारी यादवको शंकास्पद मृत्यु भएको छ। असार ४ गते विवाह भएकी दीपालाई दाइजो नदिएको कारण ससुरालीले हत्या गरेको माइती पक्षको आरोप छ।
दीपाकी भाउजु सुजिता यादवका अनुसार, पति २५ वर्षीय दिपककुमार यादवले शुक्रबार नै अर्को विवाह गर्ने धम्की दिँदै दीपालाई घरबाट लैजान आग्रह गरेका थिए। त्यसपछि सम्पर्क हुन छाडेको र शनिबार बिहान मात्र उनलाई अस्पताल ल्याइएको थाहा पाएको बताइन्। तर गजेन्द्रनारायण सिंह अस्पतालका अनुसार, अस्पताल ल्याउँदा नै उनको मृत्यु भइसकेको थियो।
मृतककी परिवारले थप दाइजो नदिँदा पति दिपक र ससुरा परशुराम यादवले योजनाबद्ध हत्या गरेको दाबी गरेका छन्। ठुलोबुबा भगवतीप्रसाद यादवले विवाहका बेला सकेजति दहेज दिएको तर थप माग गर्दा दिन नसकिएको बताए। “दीपा बिरामी परेकी भए खबर गर्थे, उल्टै फोनसमेत उठाएनन्,” उनले भने, “हामीलाई न्याय चाहिन्छ।”
प्रहरीका अनुसार घटनास्थल शंकास्पद छ। शवको घाँटीमा निलडाम भेटिएको र सुरुमा मृतकको परिवार वा प्रहरीलाई जानकारी नदिइएको प्रहरीले जनाएको छ। अनुसन्धानका लागि मृतकका पति र ससुरालाई नियन्त्रणमा लिइएको छ भने शवलाई पोस्टमार्टमका लागि विपी कोइराला स्वास्थ्य विज्ञान प्रतिष्ठान, धरान पठाउने तयारी भइरहेको प्रहरीले जनाएको छ।