मधेसी समुदायमाथि भेदभाव कायमै: जसपा अध्यक्ष यादव

पंकज ठाकुर,
जनकपुरधाम, १४ भाद्र ।
जनता समाजवादी पार्टी (जसपा) नेपालका अध्यक्ष उपेन्द्र यादवले मधेसी समुदायमाथि भेदभाव अझै कायम रहेको बताएका छन्। शनिबार जनकपुरधाममा सम्पन्न मधेसी स्वास्थ्यकर्मी फोरम नेपालको दोस्रो प्रदेश महाधिवेशनलाई सम्बोधन गर्दै अध्यक्ष यादवले मधेसप्रति राज्यको व्यवहार भेदभावपूर्ण रहेको आरोप लगाए।
यादवले मधेसलाई आर्थिक विकासमा कमजोर बनाइएको र सरकारी निकायमा प्रतिनिधित्व न्यून रहेको बताए। उनले भने, “मुलुकमा आधाभन्दा बढी मधेसी समुदाय भए पनि कुनै निकायमा समावेशीता अत्यन्तै न्यून छ। प्रतिनिधि सभामा केही हदसम्म प्रतिनिधित्व भए पनि राष्ट्रिय सभामा ५९ सदस्यमध्ये जम्मा ६ जनामात्रै मधेसी छन्। भेदभाव कम भएको छ, तर समाप्त भएको छैन।”
अध्यक्ष यादवले सत्ता साझेदारीमा मधेसले जनसंख्याको आधारमा बराबरी हिस्सा पाउनुपर्नेमा जोड दिँदै यस्तो राजनीतिक अधिकारलाई आफ्नो लक्ष्य बनाएको स्पष्ट पारे। उनले शोषण र उत्पीडन अन्त्य नगरी समृद्ध समाज निर्माण सम्भव नहुने दाबी गरे।
साथै, यादवले दलित समुदायको हकहितका लागि संघर्ष जारी राख्न आह्वान गर्दै भने कि आफ्नो हक अधिकार प्राप्तिका लागि रोएर बस्नुको विकल्प नभई लडेर लिनुपर्छ। उनले दलित र मधेसी समुदायलाई संगठित भई जसपा नेपालको संघर्षमा साथ दिन आग्रह गरे। यादवले मधेसका सबै जातजाति र समुदायले समान अधिकार प्राप्त नगरेसम्म पार्टीको आन्दोलन जारी रहने स्पष्ट पारे।