सप्तरीमा जसपा नेपालको भूमि विधेयक र उपेन्द्र यादवमाथि छानबिनको षड्यन्त्र विरुद्ध प्रदर्शन

उमेश कुमार यादव,
राजविराज, १४ भाद्र ।
सप्तरीको डाक्नेश्वरी नगरपालिका–पथरगाडामा जनता समाजवादी पार्टी (जसपा) नेपालले भूमि विधेयक र गौर घटनामा अध्यक्ष उपेन्द्र यादवलाई फसाउने षड्यन्त्रको विरोधमा शनिबार बृहत प्रदर्शन तथा कोणसभा आयोजना गरेको छ।
जसपा नेपाल जिल्ला कमिटी सप्तरीले आयोजना गरेको विरोध ¥याली नगर समितिका अध्यक्ष लक्षणदेव साहको नेतृत्वमा निकालिएको थियो। ¥यालीमा “भूमि विधेयक फिर्ता गर”, “राजनीतिक मुद्दा खारेज गर”, “लाल आयोगको प्रतिवेदन सार्वजनिक गर”, “थारु–मधेसी एक हौं” जस्ता नाराबाजी गर्दै नगर परिक्रमा गरी कोणसभामा परिणत गरिएको थियो।
कोणसभालाई सम्बोधन गर्दै जसपा नेपालका महासचिव मनिष सुमनले भूमि विधेयकलाई अघि बढाइए वा गौर घटनामा अध्यक्ष उपेन्द्र यादवलाई फसाउने षड्यन्त्र गरिएमा पार्टी सशक्त आन्दोलनमा उत्रिने चेतावनी दिए। राष्ट्रिय सभा सदस्य पुजा चौधरीले सरकारले देशलाई द्वन्द्वतर्फ धकेलेको आरोप लगाउँदै चौथो मधेस विद्रोह सुरु भइसकेको बताइन्।
प्रदर्शनमा जिल्ला अध्यक्ष केदार प्रसाद यादव, सांसद किरण साह, उपमा देव, शैलेन्द्र मोहन झा, डा. बबीसिंह यादव, रमिला साह, रेणु मण्डल, शिवनारायण साह, दिनेश यादव, राजेश्वर राय, लक्ष्मण यादव, निरज मुक्ती, अरविन्द यादव, बिनोद यादवसहित सयौं कार्यकर्ताको उपस्थिति थियो।
जसपा नेपालले पहिलो चरणको आन्दोलन अन्तर्गत सप्तरीका चारै निर्वाचन क्षेत्रमा प्रदर्शन गर्ने निर्णयअनुसार बुधबार भारदह, बिहीबार बोदेबरसाईन, शुक्रबार तोपामा विरोध कार्यक्रम सम्पन्न भइसकेको र शनिबार क्षेत्र नं. ३ अन्तर्गत पथरगाडामा बृहत प्रदर्शन गरिएको जनाएको छ।