राजविराजमा बीएड चौथो वर्षको नतिजा विवाद: विद्यार्थीले गरे मविव क्याम्पसमा तालाबन्दी

ईमधेश न्यूज सम्वाददाता,
राजविराज, १३ भाद्र ।
महेन्द्र विन्देश्वरी बहुमुखी क्याम्पस (मविव), राजविराजमा बीएड चौथो वर्षको नतिजामा प्रयोगात्मक परीक्षाको अंक समावेश नगरिएको भन्दै विद्यार्थीहरुले शुक्रबार तालाबन्दी गरेका छन्। बिहीबार सार्वजनिक भएको नतिजामा सबै विद्यार्थीलाई प्रयोगात्मक परीक्षामा अनुपस्थित देखाइएपछि विद्यार्थी आक्रोशित बनेका हुन्।
विद्यार्थीहरुले शिक्षा शास्त्र संकायका प्रमुख रामअषिश यादव र परीक्षा शाखाका प्रमुख चन्देश्वर यादवको स्वार्थका कारण नतिजामा गडबडी भएको आरोप लगाएका छन्। स्वतन्त्र विद्यार्थी युनियन (स्ववियु) राजविराज क्याम्पसका सभापति रञ्जितकुमार यादवले विद्यार्थी बाध्य भएर तालाबन्दीमा उत्रिनु परेको बताए। उनले प्रयोगात्मक अंक समावेश नगरिएसम्म तालाबन्दी जारी रहने चेतावनी दिए।
तालाबन्दीका कारण परीक्षा शाखाका कर्मचारी भित्रै थुनिएका छन् भने विद्यार्थी शाखा अगाडि धर्नामा बसेका छन्। यसबीच, क्याम्पस प्रमुख सुशीलचन्द्र कर्णले विद्यार्थीको माग सम्बोधनका लागि समन्वय भइरहेको बताउँदै प्रयोगात्मक अंक नतिजामा समावेश गराइने प्रक्रिया अघि बढेको जानकारी दिएका छन्। बीएड चौथो वर्षको परीक्षामा एक सय ३० जना विद्यार्थी सहभागी भएका थिए।