तिज अन द वालमा महिलाको साहसिक आरोहण, संस्कृतिसँगै खेल प्रवद्र्धन

ईमधेश न्यूज सम्वाददाता,
काठमाडौं, ०९ भाद्र ।
 सर्वोच्च शिखर सगरमाथाको दुबै मोहडा नेपाल र तिब्बतबाट सफल आरोहण गरी विश्वकिर्तिमान राखिसकेकी आरोही कल्पना महर्जनको अगुवाइमा ‘तिज अन द वाल’ (स्पोर्ट क्लाइम्बिङ) कार्यक्रम सम्पन्न भएको छ ।
हरेक वर्ष नेपाली महिलाहरूको महान पर्व हरितालिका तिजको उपलक्ष्यमा आयोजित यस कार्यक्रमलाई यसपटक “संस्कृति र साहस सँगसँगै” भन्ने नारासहित आयोजना गरिएको हो । राजधानीको धुम्बाराहीस्थित पासाङ ल्हामु स्पोट्र्स क्लाइम्बिङ भित्तामा सम्पन्न कार्यक्रममा नेपाली सेनाकी महिला जवानहरू र दुई पाड.ग्रे क्विनका सदस्यहरू समेत सहभागी बनेका थिए ।
साहसिक खेल स्पोर्ट क्लाइम्बिङको प्रवद्र्धन गर्ने उद्देश्यसहित हरेक वर्ष महिला सहभागिता सुनिश्चित गर्दै आएको आयोजक संस्थाले जानकारी दिएको छ । महर्जनले सहभागी महिलाहरुलाई क्लाइम्बिङ अभ्यास समेत गराएकी थिइन् ।
तिजलाई फरक ढंगले मनाउने उद्देश्यले सुरु गरिएको कार्यक्रममार्फत ‘भगवान शिवलाई पाउन पार्वती माताले गरेको कठिन तपस्याबाट जस्तै लक्ष्य प्राप्त गर्न कठोर संघर्ष आवश्यक हुन्छ’ भन्ने सन्देश प्रवाह गरिएको आयोजकले जनाएको छ ।
कार्यक्रम माउण्टेन एडभेन्चर स्पोट्र्स एकेडेमी, उपत्यका विशेष समिति र स्पोट्र्स क्लाइम्बिङ बागमती प्रदेशको सहकार्यमा सम्पन्न भएको हो ।