मधेशमा एसईईमा ७२% नन–ग्रेडेड, खुश्बु ओलीद्वारा ‘शैक्षिक आपतकाल’ घोषणा गर्न माग

लिलाकान्त यादव,
जनकपुर, ०६ भाद्र ।
 यस वर्षको माध्यमिक शिक्षा परीक्षा (क्भ्भ्) परिणामले मधेश प्रदेशमा गम्भीर शैक्षिक संकट उजागर गरेको छ। राष्ट्रिय स्तरमा ६२% विद्यार्थी पास हुँदा मधेशमा मात्र २८% विद्यार्थी उत्तीर्ण भएका छन्। कुल ५९ हजार ७४९ परीक्षार्थीमध्ये ४२ हजार ७७९ (७२%) विद्यार्थी नन–ग्रेडेड भएका छन्।
यही पृष्ठभूमिमा राष्ट्रिय प्रजातन्त्र पार्टी (राप्रपा) की केन्द्रीय सदस्य तथा प्रशिक्षण विभागकी उपप्रमुख खुश्बु ओलीले सोमबार मुख्यमन्त्रीलाई भेटी विस्तृत ज्ञापनपत्र बुझाउँदै ‘शैक्षिक आपतकाल’ घोषणा गर्न माग गरेकी छन्।
ज्ञापनपत्रमा विद्यालयस्तरमै असफल विद्यार्थीको पहिचान गरी ब्रिज क्लास सञ्चालन गर्ने, शिक्षक तालिम तथा मूल्याङ्कन प्रणालीमा सुधार ल्याउने, विद्यालय व्यवस्थापनलाई राजनीतिक हस्तक्षेपमुक्त बनाउनुपर्ने लगायतका सुझावहरू समावेश छन्। साथै, विद्यार्थीलाई करिअर मार्गदर्शन, मानसिक सशक्तिकरण र प्रेरणा कार्यक्रम अनिवार्य गर्नुपर्ने प्रस्ताव राखिएको छ।
खुश्बु ओलीले भनिन्, “शिक्षा केवल व्यक्तिगत अवसर होइन, संविधानले सुनिश्चित गरेको मौलिक अधिकार हो। करिब ४३ हजार विद्यार्थीहरूको भविष्य अन्धकारमा पर्न नदिन सरकार तुरुन्तै निर्णायक कदम चाल्नुपर्छ।”
प्रदेशमा शैक्षिक असमानता बढ्दै गएको भन्दै उनले यो अवस्थामा मौन बस्नु सम्पूर्ण पुस्ताको भविष्यसँग खेलवाड गर्नु सरह हुने चेतावनी दिइन्।