जसपा नेताहरू रिहा, आन्दोलन निरन्तर रहने

ईमधेश न्यूज सम्वाददाता,
काठमाडौं, ०४ भाद्र ।
 काठमाडौंको बबरमहलमा मंगलबार साँझ आयोजित मशाल जुलुसका क्रममा पक्राउ परेका जनता समाजवादी पार्टी (जसपा) नेपालका नेताहरूलाई मध्यराति रिहा गरिएको छ। नयाँ बानेश्वर प्रहरी वृत्तमा राखिएका १८ जना नेता–कार्यकर्तालाई बिना शर्त छोडिएको जसपाले जनाएको छ।
राजनीतिक प्रतिशोधस्वरूप अध्यक्ष उपेन्द्र यादवलाई गौर घटनामा तान्ने प्रयास भइरहेको भन्दै जसपाले विरोधस्वरूप काठमाडौँमा मसाल जुलुस प्रदर्शन गरेको थियो। सो क्रममा जसपाका प्रवक्ता तथा मधेश प्रदेश सांसद मनिषकुमार सुमन, प्रदेश सांसद किरण साह, लुम्बिनी प्रदेश सांसद अम्बिका दाहाल, केन्द्रीय सदस्य डा. बबी सिंह, रेणुराज सिंह, शशिकपुर मियाँ, दिनेश यादव, युवा नेता मनिष यादव ओम, विद्यार्थी नेता मनिष यादव, बलिराम कापरलगायतलाई प्रहरीले नियन्त्रणमा लिएको थियो।
रिहा भएपनि जसपाले आन्दोलनलाई निरन्तरता दिने घोषणा गरेको छ। “सरकारले आफ्नो रवैया परिवर्तन नगरेसम्म आन्दोलन जारी रहनेछ,” जसपाका नेताहरूले चेतावनी दिए।
सर्वोच्च अदालतले गौर घटनाको छानबिन गर्न परमादेश जारी गरेपछि जसपा आक्रोशित बनेको छ र पार्टीले निरन्तर प्रदर्शनलाई अघि बढाइरहेको छ।