उपेन्द्र यादवविरुद्ध सरकारले षड्यन्त्र गरेको जसपाको आरोप

ईमधेश न्यूज सम्वाददाता,
काठमाडौं, ०३ साउन ।
 सर्वोच्च अदालतले गौर हत्याकाण्डको छानबिन गर्न परमादेश दिएपछि जनता समाजवादी पार्टी (जसपा), नेपाल आन्दोलित बनेको छ। जसपाका नेता–कार्यकर्ताले प्रधानमन्त्री केपी शर्मा ओलीले सर्वोच्च अदालतमार्फत षड्यन्त्रपूर्वक अध्यक्ष उपेन्द्र यादवमाथि आरोप लगाउने प्रयास गरेको भन्दै राजधानीमा विरोध प्रदर्शन गरेका छन्।
समाजवादी विद्यार्थी युनियन, नेपालको आयोजनामा मंगलबार काठमाडौँको माइतीघर मण्डलामा प्रदर्शन गरिएको हो। सहभागीहरूले सरकारको कदमलाई राजनैतिक प्रतिशोधको हिस्सा ठहर गर्दै “उपेन्द्र यादवलाई फसाउने षड्यन्त्र बन्द गर” भन्ने नारासहित प्रदर्शन गरेका थिए।
प्रदर्शनकारीहरूले सरकारद्वारा ल्याइएको भूमि विधेयकमा जसपा, नेपालले असहमति जनाएपछि नै उपेन्द्र यादवमाथि मुद्दा तानेर दबाब सिर्जना गर्न खोजिएको आरोप लगाए। गौर हत्याकाण्डमा तत्कालीन माओवादी नेता प्रभू साहको संलग्नता रहेको दाबी गर्दै उनीहरूले दोषीलाई बचाएर यादवलाई मात्र निशाना बनाउने प्रयास भइरहेको बताएका छन्।
गौर हत्याकाण्ड २०६३ साल चैत ७ गते भएको हो। सो दिन गौरस्थित राइस मिल क्षेत्रमा तत्कालीन मधेसी जनअधिकार फोरम (उपेन्द्र यादव नेतृत्वमा) र तत्कालीन नेकपा माओवादीले एउटै स्थानमा छुट्टाछुट्टै सभा गर्न लाग्दा झडप भएको थियो। उक्त घटनामा २७ जना माओवादी कार्यकर्ताको घटनास्थलमै र एकजनाको उपचारका क्रममा मृत्यु भएको थियो।
जसपाका नेताहरूले यस घटनालाई फेरि राजनीतिक उद्देश्यका लागि प्रयोग गर्न खोजिएको भन्दै चेतावनी दिएका छन्। उनीहरूले उपेन्द्र यादवविरुद्ध गरिने कुनै पनि षड्यन्त्रलाई पार्टीले कठोर प्रतिवाद गर्ने घोषणा गरेका छन्।