ओली सरकार कामचलाउ, राष्ट्रपतिले नयाँ सरकार गठनको आह्वान गर्नुपर्छ:अधिवक्ता न्यौपाने

ईमधेश न्यूज सम्वाददाता,
काठमाडौं, ०३ भाद्र ।
 अधिवक्ता यज्ञमणी न्यौपानेले वर्तमान ओली सरकारको वैधानिकता समाप्त भइसकेको भन्दै अब राष्ट्रपतिले संविधानको धारा ७६ अनुसार नयाँ सरकार गठनको प्रक्रिया अघि बढाउनुपर्ने बताएका छन्। मंगलबार राजधानीको संवाद डबलीमा स्वतन्त्र कानुन व्यवसायी मञ्चले आयोजना गरेको कार्यक्रममा उनले उपसभामुख इन्दिरा रानामगरलाई हटाउने तयारी गैरसंवैधानिक भएको जिकिर गरे।
उनले उपेन्द्र यादव नेतृत्वको जनता समाजवादी पार्टी नेपालले गत असार ३१ गते सरकारलाई दिएको विश्वासको मत फिर्ता लिएपछि ओली सरकारले ३० दिनभित्र प्रतिनिधिसभाबाट विश्वासको मत लिनुपर्ने संवैधानिक व्यवस्था रहे पनि त्यसो नगरेको बताए। “समर्थन फिर्ता लिएपछि सरकार स्वतः कामचलाउ बनेको हो, त्यसैले उपसभामुखलाई महाअभियोग लगाउने वा पदच्युत गर्ने अधिकार सरकारसँग छैन,” न्यौपानेले भने।
न्यौपानेले जनताको पक्षमा काम गर्ने सट्टा भ्रष्टाचार र कुशासनलाई प्रोत्साहन दिने सरकार उपसभामुखविरुद्ध कारबाही गर्न खोज्नु संविधानको धारा ९१ को उल्लंघन भएको बताए। उनका अनुसार नयाँ सरकार बनेपछि मात्रै संसदमा महाअभियोग प्रस्ताव दर्ता गर्न सकिने हो।
“वर्तमान सरकारले संविधानलाई बेवास्ता गरेको देखिन्छ, यस्तो अवस्थामा राष्ट्रपतिले नयाँ सरकार गठनको लागि आह्वान गर्नुपर्छ,” उनले जोड दिए।