दोरम्बा हत्याकाण्डमा दोषीलाई कारबाहीको माग ः पीडित परिवार र सरोकारवालाको आक्रोश

ईमधेश न्यूज सम्वाददाता,
काठमाडौं, ०१ भाद्र ।
दोरम्बा हत्याकाण्डलाई २३ वर्ष पुग्दा पनि न्याय नपाएको भन्दै पीडित परिवारले दोषीहरुलाई कानुनी दायरामा ल्याउनुपर्ने माग गरेका छन्। शनिबार राजधानीमा अखिल नेपाल लेखक संघले आयोजना गरेको २३औं स्मृति दिवसमा पीडित परिवार, राजनीतिक दलका नेताहरु र सरोकारवालाले राज्यपक्षका दोषीलाई संरक्षण गर्दै माओवादी पक्षलाई मात्र अपराधीकरण गरिएको भन्दै रोष व्यक्त गरे।
विप्लव नेतृत्वको नेकपाका पोलिटब्युरो सदस्य माईला लामाले राज्यले शान्ति प्रक्रियालाई टुङ्गोमा पुर्याउन ढिलाइ गरेको भन्दै दोरम्बासहितका घटनामा अन्यायपूर्ण व्यवहार भएको बताए। उनले विद्रोही पक्षलाई दोषी ठहर्याएर सेनालाई उन्मुक्ति दिने प्रचलन अन्यायपूर्ण भएको भन्दै माओवादीबीच एकताको आवश्यकता रहेको जोड दिए।
वरिष्ठ अधिवक्ता एकराज भण्डारीले शान्ति प्रक्रियालाई टुङ्गोमा पुर्याउने सट्टा भाँडिएको उल्लेख गर्दै जनयुद्धमा संलग्न नेताहरुलाई जेल कोचिँदा, २१ जना निहत्था कार्यकर्ताको हत्या गर्ने मेजर राममणि पोखरेलसहितका जिम्मेवार सेनालाई बचाउनु ठूलो त्रुटि भएको टिप्पणी गरे।
नेकपाका युवा नेता शेरबहादुर विश्वकर्माले शान्ति वार्ताको बेला निहत्था माओवादीमाथि गोली प्रहार हुनु अक्षम्य अपराध भएको बताए। सहिद सानोराम तामाङका छोरा लशकुश तामाङले आफ्ना बुबासहित २१ जनाको निर्मम हत्या गर्ने दोषीहरुलाई पनि सजाय दिनुपर्ने माग दोहो¥याए।
२०६० साल साउन ३२ गते रामेछापको दोरम्बामा सेनाले नियन्त्रणमा लिएका २१ जना माओवादी नेता तथा कार्यकर्तालाई डाँडाकटेरीमा लगेर गोली हानी हत्या गरेको थियो। सो घटनापछि माओवादीले तत्कालीन शान्ति वार्ता तोडेका थिए।
पीडित परिवारले अझैसम्म दोषीलाई कारबाही नगरेको भन्दै न्यायको अपेक्षा कायम राखेका छन्। आयोजकले कार्यक्रममा सहिद परिवारलाई दोसल्ला ओढाएर सम्मान पनि गरेको थियो।