राजविराजमा कृष्ण जन्माष्टमी अवसरमा रथयात्रा सम्पन्न

लिलाकान्त यादव,
राजविराज, ०१ भाद्र ।
 भगवान श्रीकृष्णको जन्माष्टमीको अवसरमा सोमबार सप्तरीको राजविराजमा भव्य रथयात्रा सम्पन्न भएको छ। धार्मिक संस्थाहरू, मठ–मन्दिर र स्थानीय बासिन्दाको सक्रिय सहभागितामा आयोजना गरिएको रथयात्रामा हजारौं श्रद्धालुहरूको उत्साहपूर्ण उपस्थिति रह्यो।
रथयात्रा नगरका प्रमुख चोक, बजार र बस्तीहरू परिक्रमा गर्दै सम्पन्न भएको हो। सहभागीहरूले भगवान कृष्णका भजन–कीर्तन, शंखध्वनि, बाजागाजा र नृत्यसहितको शोभायात्रा प्रस्तुत गरेका थिए। यसले सम्पूर्ण शहरमा धार्मिक माहोल सिर्जना गरेको थियो।
यसै अवसरमा भक्तजनहरूले मठ–मन्दिरमा विशेष पूजाआजा, रातभर हरि–कीर्तन तथा धार्मिक प्रवचन गरेका थिए। विभिन्न ठाउँमा निःशुल्क प्रसाद वितरण गरिएको थियो।
यस्तै विराटनगर, इटहरी, झुम्का र इनरुवामा समेत कृष्ण जन्माष्टमी विशेष शोभायात्रा, धार्मिकसभा र सांस्कृतिक कार्यक्रम सम्पन्न भएका छन्। भक्तजनले भगवान कृष्णलाई धर्म, नीति र न्यायका प्रतीकका रूपमा स्मरण गर्दै, सत्य र सदाचारमा अडिग रहनुपर्ने सन्देश ग्रहण गरेका छन्।
कृष्ण जन्माष्टमी पर्व यस वर्ष पनि मधेसदेखि पहाडसम्म उल्लासपूर्वक मनाइएको छ।