सुनसरीमा बस–माइक्रो ठोक्किँदा ३ को मृत्यु, १५ घाइते

लिलाकान्त यादव,
सुनसरी, २६ साउन ।                                                                                                                                         सुनसरीको भोक्राहा नरसिंह गाउँपालिका–३ जलुवाटोलस्थित पूर्वपश्चिम राजमार्गमा सोमबार बिहान भएको भीषण सवारी दुर्घटनामा ३ जनाको मृत्यु भएको छ भने १५ जना घाइते भएका छन्। काँकडभिट्टाबाट दिक्तेलतर्फ जाँदै गरेको मे १ ख १७९९ नम्बरको यात्रुबाहक बस र विपरीत दिशाबाट आइरहेको प्रदेश २–०१–००१ ज ००४७ नम्बरको विङ्गर (माइक्रोबस) एकआपसमा ठोक्किँदा दुर्घटना भएको हो।
जिल्ला प्रहरी कार्यालय सुनसरीका प्रहरी प्रवक्ता डिएसपी योगराज खतिवडाका अनुसार मृतकको पहिचान हुन सकेको छैन। घाइतेमध्ये केहीको अवस्था गम्भीर छ। उनीहरूलाई इनरुवा, विराटनगर न्यूरो अस्पताल र नोबेल अस्पतालमा उपचार भइरहेको छ। बस चालक झापा अर्जुनधारा नगरपालिका–१ का गोपाल अधिकारीलाई प्रहरीले नियन्त्रणमा लिएर थप अनुसन्धान गरिरहेको जनाएको छ। प्रारम्भिक अनुसन्धान अनुसार तीव्र गतिका कारण दुर्घटना भएको हुनसक्ने आशंका गरिएको छ।