सप्तरीमा प्रहरीको गोलीबाट एक जनाको मृत्यु, मदिरा तस्करीमा सर्च अपरेसन

लिलाकान्त यादव,
राजविराज, २१ साउन ।
 सप्तरीको राजगढ गाउँपालिका–२ कमलपुरमा अवैध मदिरा तस्करी नियन्त्रणका लागि प्रहरीले चलाएको सर्च अपरेसनका क्रममा गोली लागेर एक जनाको मृत्यु भएको छ।
मृतक ३६ वर्षीय लालु यादव भारतीय सीमाबाट मदिरा तस्करीमा संलग्न रहेको आशंकामा प्रहरीले निगरानी बढाएपछि झडप भएको हो। प्रहरीले दिएको जानकारी अनुसार स्थानीयबासीले प्रहरीलाई घेराबन्दी गरी ढुङ्गामुढा गरेपछि आत्मरक्षाका लागि गोली चलाउनु परेको थियो। यादवको तिघ्रामा गोली लागेको थियो र उपचारका लागि लैजाने क्रममा बाटोमै उनको मृत्यु भएको हो।
अपरेसनको क्रममा प्रहरीले विभिन्न ब्रान्डका ८० कार्टुन मदिरा बरामद गरेको छ।
यसअघि पनि प्रहरीद्वारा छिन्नमस्ता गाउँपालिका–१ बरहीविरपुरमा हेरोइनसहित दुई जनालाई हवाई फायर गरी नियन्त्रणमा लिइएको थियो।
सप्तरीको सीमावर्ती क्षेत्रमा तस्करी नियन्त्रणका लागि प्रहरीको सक्रियता पछिल्लो समय बढेको छ।